ދިވެހިރާއްޖޭގެ މަސްވެރިކަމުގެ އާންމު ގަވާއިދުން، ވެލާ ކަހަނބާއި އޭގެ ބިސްނެގުން މަނާވާ މާއްދާ އުނިކޮށްފި

ދިވެހިރާއްޖޭގެ މަސްވެރިކަމުގެ އާންމު ގަވާއިދުން، ވެލާ ކަހަނބާއި އޭގެ ބިސްނެގުން މަނާވާ މާއްދާ އުނިކޮށްފި އެވެ.

ފިޝަރީޒް މިނިސްޓްރީން ބުނީ، އެ މާއްދާ އުނިކޮށްފައި ވަނީ، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން އެތަކެތި ހިމާޔަތް ކޮށްފައި ވާތީ ކަމަށެވެ. އަދި އެ ވުޒާރާއިން އެ ހުކުމް ތަންފީޒު ކުރާނެތީ ކަމަށެވެ.

"މި އިޞްލާޙުގެ އެންމެ ބޮޑު އެއް މަގުސަދަކީ، ސަރުކާރުގެ އެހެން އިދާރާތަކުން ކުރަމުންދާ މަސައްކަތްތަކާއި  އެ އިދާރާތަކުން ތަންފީޒު ކުރަމުންދާ ގަވާއިދުތަކާ ގުޅޭގޮތުން ފާހަގަކުރެވިފައިވާ ބައެއް ފުށުއެރުންތައް ޙައްލުކޮށް، މި ގަވާއިދު އެންމެ ފުރިހަމައަށް ތަންފީޒުކުރުމަށް ބޭނުންވާ ޤާނޫނީ ޙައްލުތައް ހޯދުމެވެ." ދިވެހިރާއްޖޭގެ މަސްވެރިކަމުގެ އާންމު ގަވާއިދަށް ގެނައި އިސްލާހުގައި ވެއެވެ.

އެގޮތުން ދިވެހިރާއްޖޭގެ ކަނޑުގެ ސަރަޙައްދުގެ ތެރެއިން ހިފުމާއި، ބޭނުމާއި، ނެގުމާއި، މެރުން މަނާ ބާވަތްތަކުގެ ތެރެއިން މަޑި، ވެލަޔާއި ކަނހަބާއި އޭގެ ބިސް މިހާރުވާނީ އުނިކޮށްފައެވެ. އެތަކެތި މަނާވާނީ މިނިސްޓްރީ އޮފް އެންވައިރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީއިން އެކުލަވައިލައިފައިވާ، ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދުގެ ދަށުންނެވެ.

މީގެ އިތުރުން، އެ އިޞްލާޙުގައި މުނިފޫހިފިލުވުމަށް ކުރާ މަސްވެރިކަން ކުރުމަށް ޤާއިމްކޮށްފައިވާ އޮއިވާލި ކަނދުފަތީގެ ވިއުގައިގައި ހިމެނޭ ކަނދުފަތިތަކުގެ ކައިރީގައި މަސްވެރިކަން ކުރެވޭނެ އުސޫލު ވެސް ބަޔާންކޮށްފައިވެއެވެ.

އަދި މީހުން ދިރިއުޅޭ ރަށްރަށުގެ ފަޅުގެ ސަރަޙައްދުގައި ވަކިވަކި ފަރުދުން އަމިއްލަ ބޭނުމަށް ކުރާ މަސްވެރިކަމުގެ ހަރަކާތްތަކުގައްޔާއި ރައްޔިތުންގެ ބައިވެރިވުން ހިމެނޭގޮތަށް ރަށުފެންވަރުގައި ސަޤާފީގޮތުން ކުރާ މަސްވެރިކަމުގައި ދައު ބޭނުންކުރުމުގައި ޢަމަލުކުރަންޖެހޭ ގޮތާއި، ކައުންސިލްތަކުގެ ދައުރު ބަޔާންކުރާ މާއްދާއެއްވެސް މި އިޞްލާޙުގައި ހިމަނައިފައި ވެއެވެ.