ހދ. ނެއްލައިދޫއަކީ މިހާރުު މަސްވެރިކަމަށް އެހާ މަޝްހޫރު ރަށެއް ނޫން ނަމަވެސް އެރަށުގައި އަމިއްލަ ފަރާތަކުން މަސްފެކްޓްރީއެއް އިމާރާތްކޮށް ހިންގައެވެ.
ނެއްލަދިއޫއަކީ އެ އަތޮޅުގައި މީހުން ދިރިއުޅޭ 8 ވަނަ ރަށެވެ.
"އުތުރުން ދެކުނަށް" ޒުވާން މަސްވެރިޔާ ހަސަން ސާޖިން ކުރަމުން އަންނަ ދަތުރުގައި، ނެއްލައިދޫއާ ބެހޭގޮތުންވެސް ވަނީ ޕްރޮފައިލް ރިޕޯޓެއް ތައްޔާރު ކޮށްފައެވެ.
އެގޮތުން އެ ރިޕޯޓުގައި ބުނާގޮތުން، 32 ހެކްޓަރު ހުންނަ އެި ރަށުގެ އާބާދީގައި 1406 މީހުން ދިރިއުޅެއެވެ. މިއީ އާބާދީގެ ނިސްބަތުން އެި އަތޮޅުގައި އެންމެ ގިނަ މީހުން ވަޒަންވެރިވެގެން ދިރިއުޅޭ ރަށެވެ. މިވަގުތު ރަަށުގައި އާބާދުވެގެން 1100 އެއްހާ މީހުން ދިރިއުޅެއެވެ.
ނެއްލައިދޫގެ ތައުލީމަށް ބަލާއިރު، މިއީ އަތޮޅުން ނަމޫނާ ރަށެކެވެ. އެި ރަށު ސްކޫލުގައި ގްރޭޑް 12އާ ހަމައަށް ކިޔަވައިދެމުން ދާއިރު، މިއީ ކުޅުދުއްފުށި ފިޔަވާ އެ އަތޮޅުން އޭ ލެވެލް އާ ހަމަޔަށް ކިޔަވައިދެމުންދާ ހަމައެކަނި ރަށެވެ.
ނެއްލައިދޫގައި ހިމެނޭ އާސާރީ ބިނާތަކަށް ބަލާއިރު، އެރަށުގައި ހުންނަ ކުޑަ މިސްކިތަކީ އެރަށުގެ އެންމެ ދުވަސްވީ އެއް އާސާރެވެ. މަސްޖިދުލް ހުސައިންގެ ނަމުން ނަންދެވިފާވާ މި މިސްކިތަކީ ފޮތިގަލާ އުވައިން ރާނާ، ލަކުޑިން މަތިވަޑާން ގަނޑު ހަދާ، އީޓުން ހިޔާކޮށްފައިވާ މިސްކިތެކެވެ. ދިގުމިނުގައި 41 ފޫޓު އަދި ފުޅާމިނުގައި 22 ފޫޓު ހުންނަ މި މިސްކިތް ބިނާކުރި ސީދާ ތާރީހެއް އެނގެން ނެތް ނަމަވެސް މި މިސްކިތަށް މިހާރު 480 އަށްވުރެ ގިނަ އަހަރު ވެދާނެ ކަމަށް އެރަށު މީހުން ލަފާކުރެއެވެ.
ތާރީހީ ގޮތުން ގިނަ ދުވަސްތަކެއް ވެފާވާމި އިމާރާތް ރައްކާތެރި ކުރުމަށް އެކަށީގެންވާވަރުގެ މަސައްކަތްތަކެއް ކުރެވިފައެއް ނުވެއެވެ.
ނެއްލައިދޫއަކީ މަސްވެރިކަމުގެ ރޮނގުން މުޅި ހދ އިން އެއްވަނަ ހޯދާފައިވާ ރަށެއް ކަމަށް އިހުއްސުރެން އެ އަތޮޅު ފަރިހީގައި ނެއްލައިދޫ ސިފަކޮށްދީފައިވެއެވެ. މަސްވެރިކަމުގެ ރޮނގުން މުޅި އަތޮޅުގައިވެސް ނެއްލައިދޫއާ ވާދަކޮށްލެވޭ ރަށެއް، އެދުވަސްވަރު ނެތްކަން މަސްވެރިކަމާ ގުޅުންހުރި މުބާރާތްތަކުން ހޯދާފައިވާ ވަނަތަކުން ކާބަފައިން ވަނީ ސާބިތުކޮށްދީފައެވެ.
ޒަމާނަށް އައި ބަދަލާއެކު ކަނޑުމަހުގެ މަސްވެރިކަން އުވިގެން ދިޔަ ނަމަވެސް ފަރުމަހުގެ މަސްވެރިކަން އަދިވެސް އެރަށުގައި ކުރަމުންދެއެވެ. އަދި ޒަމާނީ މަސް ފެކްޓްރީއެއް އަމިއްލަ ފަރާތަކުން އަންނަނީ ރަށުގައި ހިންގަމުންނެވެ.
އެހެންކަމުން ރިހާކުރާ، ވެކިއުމް ކުރެވިފައިވާ ވަޅޯމަސް ފަދަ މަހުގެ ބާވަތްތައް އަބަދުވެސް ރަށުގައި ތިޔާގިކަމާއެކު ލިބެންހުރެއެވެ. ހދ. އަތޮޅުގައި ނެއްލައިދޫ މަޝްހޫރުވެފައި ވަނީ ހީވާގި މަސައްކަތްތެރިން އުޅޭ ރަށެއްގެ ގޮތުގައެވެ.
އެރަށުގެ ރައްޔިތުންނަކީ ފުދުންތެރި ދިރިއުޅުމެއް އުޅެމުން އަންނަ ބައެއްކަން، ރަށުގެ ވިޔަފާރިތަކާ، ރަށުގެ ފަޅުތެރޭގައިވާ ޑިންގީތަކަށް ބަލާލުމުންވެސް ހާމަވެގެންދެއެވެ.
އާމްދަނީ ހޯދުމުގެ ގޮތުން ތަފާތު މަސައްކަތްތައް އެރަށު ރައްޔިތުން ކުރެއެވެ. އެގޮތުން އަންހެންވެރިން ތައްުޔާރުކުރާ މީރު ކުދި ސަމްބޯސާ އަދި މަދުމެޓާކަނޑަކީ ބޮޑުތިލަދުންމައްޗަށް މަޝްހޫރު އެއްޗެކެވެ.
ފަންގިވިނުމާ ރޯނުވެށުމުގެ މަސައްކަތަކީވެސް އާމްދަނީ ހޯދުމުގެ ގޮތުން އެރަށުގެ އަންހެންވެރިން ކުރަމުން އަންނަ މަސައްކަތެކެވެ. އެރަށުގެ ފިރިހެންވެރިން އާމްދަނީ ހޯދުމަށް ރިސޯޓު ވަޒީފާތަކުގައި ހަރަކާތްތެރިވެއެވެ.
އަދި ލަނޑާ ނެގުމުގެ މަސައްކަތުގައިވެސް ގިނަ އަދަދެއްގެ ޒުވާނުން ދަނީ ހަރަކާތްތެރިވަމުން. އެގޮތުން 60 މީހުން ހިމެނޭ 8 ގުރޫޕަކުން މިހާރުވެސް އެރަށުގައި ލަނޑާ ނެގުމުގެ މަސައްކަތް ކުރެއެވެ.
