މިފްކޯއިން މަސްވެރިންގެ އަތުން ގަތް މަހުގެ އަދަދު މިދިޔަ އަހަރުގެ ފުރަތަމަ 6 މަހަށްވުރެ %26 އިތުރުވެއްޖެއެވެ.
މިފްކޯއިން އާއްމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ ޖޫންމަހުގެ 30 ވަނަ ދުވަހުގެ ނިޔަލަށްވަނީ 39607 ޓަނުގެ މަސް ގަނެފައިވާއިރު، މިދިޔަ އަހަރުގެ މި މުއްދަތުގައި ގަނެފައިވަނީ 31408 ޓަނުގެ މަހެވެ. އެހެންކަމުން މަސް ގަތް އަދަދު ވަނީ 26 އިންސައްތަ އިތުރުވެފައެވެ.
މަސްވެރިންނަށް ދޫކޮށްފައިވާ ފައިސާގެ އަދަދުވެސްވަނީ އިތުރުވެފައެވެ. އެގޮތުން އަހަރުގެ މިހާތަނަށް 659 މިލިއަން ރުފިޔާ ދޫކޮށްފައިވާއިރު، މިދިޔަ އަހަރުގެ މި މުއްދަތުގައި ދޫކޮށްފައިވަނީ 506 މިލިއަން ރުފިޔާއެވެ.
މިފްކޯއިން މަސްވެރިންގެ އަތުން މަސް ގަންނަމުންދަނީ މައިގަނޑުގޮތެއްގައި އެކުންފުނީގެ 3 ކޮމްޕްލެކްސްއަކުންނެވެ. ތަފާސްހިސާބުތައް ދައްކާގޮތުން އެންމެ ގިނަ އަދަދަކަށް މަސް ކިރުވާފައިވަނީ ކޫއްޑޫ ފިޝަރީޒް ކޮމްޕްލެކްސްއަށެވެ.
އެ ސެންޓަރަށް އަހަރުގެ މިހާތަނަށްވަނީ 30412 ޓަނުގެ މަސް ކިރުވާފައެވެ. މި އަދަދަކީ މިދިޔަ އަހަރުގެ މި މުއްދަތާއި އަޅާ ބަލާއިރު %26 އިތުރު އަދަދެކެވެ. އެންމެ މަދުން މަސް ކިރުވާފައިވަނީ އައްޑޫ ފިޝަރީޒް ކޮމްޕްލެކްސްއަށެވެ. އެސެންޓަރަށް ކިރުވާފައިވަނީ 4351 ޓަނުގެ މަހެވެ.
މިފްކޯއިން ދަނީ އެކުންފުނީގެ ސެންޓަރުތައް އަޕްގްރޭޑުކުރުމަށް ގިނަ މަސައްކަތްތަކެއް ކުރަމުންނެވެ. އަދި މި މަސައްކަތް ނިމުމުން މިފްކޯއިން މަސް ކިރުވުމަށް ހުރި ދަތިތަކަށް ހައްލު ލިބިގެންދާނެ ކަމަށްވެސް އެކުންފުނިން ހާމަކުރެއެވެ.
