7 ލައްކަ ޑޮަލަރުގެ އަގުހުރި މާވަހަރެއް ވިއްކަން މަސައްކަތްކުރި ބަޔަކު އިންޑިއާގައި ހައްޔަރުކޮށްފިއެވެ.
މާވަހަރަކީ ދުނިޔޭގެ ބާޒާރުގައި އަގު ހުރި އެއްޗެކެވެ. އެހެން ނަމަވެސް އިންޑިއާގައި މާވަހަރުގެ ވިޔަފާރި ކުރުމަކީ މަނާ ކަމެކެވެ. ސަބަބަކީ ސްޕާމް ވޭލް އަކީ އެޤައުމުގައި ހިމާޔަތްކޮށްފައިވާ އެއްޗަކަށްވުމެވެ. މާވަހަރެއް ފެނިއްޖެ ނަމަ ކަމާއިގުޅޭ ފަރާތްތަކަށް އެކަން ރިޕޯޓުކޮށް، މާވަހަރު އެފަރާތްތަކާއި ހަވާލުކުރަން ޖެހެއެވެ.
7 ލައްކަ ޑޮަލަރުގެ އަގުހުރި މާވަހަރެއް ވިއްކަން މަސައްކަތްކުރި ބަޔަކު އިންޑިއާގައި ހައްޔަރުކޮށްފައިވަނީ މަހާރާޝްތުރާ ސްޓޭޓުންނެވެ. ދަންވަރުގެ ވަގުތުގައި ފުލުހުން ކުރިއަށް ގެންދިޔަ ހާއްސަ އޮޕަރޭޝަނެއްގައި 4 މީހުންވަނީ މާވަހަރާއި އެކު ހައްޔަރުކޮށްފައެވެ. އަތުލައިގަތް މާވަހަރުގެ ބަރުދަނުގައި 6.5 ކިލޯ ހުއްޓެވެ.
އެމީހުން އަތުލައިގަނެފައިވަނީ މާވަހަރު ވިއްކާލުމަށްޓަކައި އެހެން ހިސާބަކަށް އޭތި ގެންދިޔުމަށް މަސައްކަތްކުރަމުން ދަނިކޮށެވެ.
އިންޑިއާގައި މާވަހަރުގެ ވިޔަފާރިކުރުން މަނާކޮށްފައިވީ ނަމަވެސް ކަޅު ބާޒާރުގައި އޭގެ ވިޔަފާރިކުރެއެވެ. އެގޮތުން އޮންލައިން ސައިޓުތައް މެދުވެރިކޮށްވެސް މާވަހަރުގެ ވިޔަފާރިކުރެއެވެ.އެގޮތުން މި ސައިޓުތަކުގައި ކިލޯއެއްގެ މާވަހަރު އުޅެނީ 1 ކްރޯޑު ރުޕީސްއަށެވެ.
މާވަހަރު އާއްމުގޮތެއްގައި ބޭނުންކޮށް އުޅެނީ ސެންޓު އުފެއްދުމަށެވެ. އަދި މިއީ މޫދުން ފެންނަ ރަނުގެ ގޮތުގައިވެސް ގިނަ ބަޔަކު ދެކެއެވެ.
