ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށް، ގއ. ވިލިނގިލި، ހުސީނާ ދޯނީގެ ފަރާތުން 1 ޓަނު މަސް ކިޔުވައިގެން ލިބޭ ފައިސާ ހަދިޔާ ކުރަން ނިންމައިފިއެވެ.
މަސްވެރިން އެމްވީއާއި ވާހަކަދައްކަމުން ހުސީނާ ދޯނީގެ ކެޔޮޅު މުހައްމަދު ޔުސްލީން ބުނީ އެދޯނިން މަހަށް ދާ ހުރިހާ މަސްވެރިން އެއްބަސްވެގެން ދެން ބާނާ މަހުގެތެރެއިން އެއްޓަނަށްވާ ފައިސާ ފަލަސްތީން ރައްޔިތުންނަށް ހަދިޔާ ކުރުމަށް ނިންމާފައިވާ ކަމަށެވެ.
ހުސީނާ ދޯނިއަކީ 20 މަސްވެރިން މަހަށްދާ ދޯންޏެކެވެ. ކެޔޮޅު ޔުސްލީން ބުނީ އެ ދޯނިން އެއް ޓަނު މަސް ފަލަސްތީނު ރައްޔިތުންނަށް ހަދިޔާ ކުރުމަށް ނިންމާފައިވާ އިރު، މިއީ ގާތްގަނޑަކަށް 25000 ރުފިޔާ ކަމަށެވެ.
ފަަލަސްތީނުގެ ޣައްޒާއަށް އިސްރާއިލުން މެދުކެނޑުމެއް ނެތި ދެމުންގެންދާ ހަަމަލާތަކުގެ ސަބަބުން އެތައް ހާސް މުސްލިމުން ކުދިންނާއި މީހުންވަނީ ޝަހީދުވެފައެވެ. އަދި އެތައް ބައެއްގެ ގެދޮރު ހަލާކުވެ ވަކީ ނިކަމެތިވެފައެވެ.
ފަލަސްތީނު ރައްޔިތުންނަށް ދުނިޔޭގެ އެކި ހިސާބުތަކުން އެހީތެރިކަން ފޯރުކޮށްދެމުންދާއިރު، އެޤައުމުގެ ރައްޔިތުންނަށް އެހީވުމަށް ރާއްޖޭގައިވެސް ގިނަ ހަރަކާތްތަކެއް ވަނީ ފަށާފައެވެ. އެގޮތުން ފަލަސްތީނުގެ ރައްޔިތުންނާއެކު ދިވެހިން ތިބިކަން ހާމަކޮށްދިނުމަށް އެއްވުމެއް ބާއްވާފައިވާއިރު، ފައިސާގެ އެހީ ދިނުމަށް ފަންޑްވެސް ވަނީ ހުޅުވާލާފައެވެ. މީގެއިރުން އައިއޭސީއާއި މީޑިއާތައް ގުޅިގެން އަންނަ އަންގާރަ ދުވަހު ޓެލެތޯންއެއްވެސް ބޭއްވުމަށް ވަނީ ހަމަޖެހިފައެވެ.
ޣައްޒާއަށް އެހީވުމުގެ ގިނަ މަސައްކަތްތަކެއް ރާއްޖޭގެ ފަރާތުން މީގެކުރިންވެސް ވަނީ ކޮށްފައެވެ. އެގޮތުން ޒަރޫރީ ތަކެތި ފޯރުކޮށްދިނުމާއި، ގޭގެ މަރާމާތުކޮށް ބޯހިޔާވަހިކަން ފޯރުކޮށްދިނުމާއި އަދި މިސްކިތެއް ބިނާކުރުމުގެ މަސައްކަތްވެސް ކުރިއަށްދެއެވެ. ދިވެހިންގެ އެހީގައި ޣައްޒާގައި ރެސްޓޯރަންޓެއްވެސް ހަދާފައިވެއެވެ. ނަމަވެސް މީގެކުރީގެ ޙަމަލާތަކެއްގައި އެތަން ވަނީ ސުންނާފަތިކޮށްލާފައެވެ.
