މަހުގެ އަގު ކުޑަކުރަން ނިންމާފައި ނުވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)އިން ބުނެފިއެވެ.
މިފްކޯއިން މަހުގެ އަގު ކުޑަކުރަން އުޅޭކަމަށް ބައެއް މީޑިޔާތަކުގައި ރިޕޯޓު ކުރުމާ ގުޅިގެން މިފްކޯއިން އާއްމުކުރި ބަޔާނުގައި ބުނީ، މަސް ކިލޯއެއް25 ރުފިޔާއަށް ގަންނަމުންދާ ކަމަށާއި، އެ އަގު ކުޑަކުރަން މިފްކޯއިން އެއްވެސް ވަރަކަށް ނުވިސްނާ ކަމަށެވެ.
އަދި މަހުގެ އަގު ރިވިއު ކުރުމަށް ފިނޭންސް މިނިސްޓްރީއާއި ސަރުކާރުގެ އިދާރާތަކާއެކު މިފްކޯއިން ސީދާ މަޝްވަރާ ކުރަމުން ނުގެންދާކަމަށް އެ ކުންފުނިން ބުންޏެވެ.
"އަދި މިޔާއެކު މަސްކިރައި އަގުނުދެވި ހުރި ހުރިހާ ފައިސާއެއް މަސްވެރިންނަށް ދައްކައި ޚަލާޞް ކުރުމަށް ކުރަންޖެހޭ މަސައްކަތް މިދަނީ ގުޅުންހުރި ފަރާތްތަކާއެކު ކުރަމުން" މިފްކޯއިން ބުންޏެވެ.
މީގެ އިތުރުން މިފްކޯއިން ބުނީ، މަސްވެރިން އަތުން ގަނެފައިވާ މަހަށް ބަރާބަރަށް ފައިސާ ދައްކަމުން ގެންދާނެ ކަމުގެ ޔަގީންކަން ދޭ ކަމަށެވެ.
މަސް ކިލޯއެއް ގަންނަ އަގު17 ރުފިޔާއިން25 ރުފިޔާއަށް ބޮޑުކުރީ ނިމިދިޔަ ސެޕްޓެމްބަރު މަހުގެ ތެރޭގައެވެ. މަހުގެ އަގު ބޮޑުކުރީ، ޔޫރަޕްގެ މާކެޓަށް ވިއްކާ މަހުން ނަގާ22 ޕަސެންޓް ޑިއުޓީ ކަނޑާލަން ސަރުކާރާއި ޔޫރަޕިއަން ޔޫނިއަންއާއެކު ކުރެވުނު ގިނަ މަޝްވަރާތައް ޕޮޒިޓިވްކޮށް ކުރިއަށް ގެންދެވިފައި ވާތީއެވެ.
