ވެލާ ބިސް އަޅާއިރު އަލިކޮށްގެން ނުވާނެ ކަމަށް، "ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތް ކޮށް ރައްކާތެރިކުރާ ދިރޭ ތަކެއްޗާ ބެހޭ ގަވާއިދު" ގެ ފަސްވަނަ އިސްލާހުގައި ބުނެފިއެވެ.
އެ އިސްލާހުގައި ވަނީ، ބިސްވަޅުން ނުކުންނަ ޅަ ވެލަޔާމެދު ނުވަތަ ޅަ ކަހަނބާމެދު ޢަމަލު ކުރަންވީ އުސޫލެއް އާއްމުކޮށްފައެވެ.
އެގޮތުން އެ އުސޫލުގައި ވާގޮތުން، ޅަ ވެލާ ނުވަތަ ޅަ ކަހަނބު ބިސްވަޅުން ނުކުންނަނިކޮށް ފެނިއްޖެ ނަމަ، އެ ތަނެއްގައި މަޑުކުރަން ވާނީ، ބިސްވަޅާ މަދުވެގެން ހަ ފޫޓު ދުރުގައެވެ.
އަދި އެސޮރުމެން ބެލުމަށް އެއްވެސް ކަހަލަ ފްލޭޝްލައިޓެއް ނުވަތަ އައްޔެއް އެޅުވުމަކީ މަނާކަމެކެވެ.
އޭގެ އިތުރުން އެ އުސޫލުގައި ވާގޮތުން، ބިސްވަޅުން ނުކުންނަ ކުދި ވެލާ ނުވަތަ ކުދި ކަހަނބުގައި އެއްވެސް ހާލަތެއްގައި އަތްލައިގެން ނުވަތަ އޭގެ ޅަ ވެލާ ނުވަތަ ޅަ ކަހަނބު ބިސްވަޅުން ނުކުތުމާއި މޫދަށް ދިޔުމުގައި، ޤުދުރަތީ ނިޒާމަށް އެއްވެސް ހުރަހެއް އަޅައިގެން ނުވާނެއެވެ.
"އެހެން ނަމަވެސް ކުދި ވެލާ ނުވަތަ ކުދި ކަހަނބުތަކަށް މޫދަށް ދާން ނޭނގި، އެ ތަކެތި ރަށުތެރެއަށް ދާން ފަށައިފިނަމަ، މި ހާލަތުގައި އެފަދަ ވެލާ ނުވަތަ ކަހަނބު ނަގައި، ލަސްކުރުމެއް ނެތި އަވަހަށް މޫދުކައިރިން އަތިރިމައްޗަށް ދޫކޮށްލުން ހުރަހެއް ނެތް" އުސޫލުގައި ވެއެވެ.
