މަސްވެރިކަމުގައި އަމަލީ ގޮތުން ފާހަގަކޮށްލެވޭ ތިން ކެޔޮޅެއްގެ އަގު ވަޒަންކޮށްފިއެވެ.
އިއްޔެ ރޭ ބޭއްވި 43 ވަނަ މަސްވެރިންގެ ދުވަހުގެ ހާއްސަ ޖަލްސާގައި ވަނީ މަސްވެރިކަމުގައި ފާހަގަކޮށްލެވޭ ތިން ކެޔޮޅެއްގެ އަގު ވަޒަންކޮށް ހަނދާނީ ފިލައާއި ބީއެމްއެލުން ދޭ ގިފްޓް ކާޑާއި ދިރާގުގެ ޕޯސްޓް ޕެއިޑް ޕެކޭޖް ދީފައެވެ.
އެންމެ ޒުވާން ކެޔޮޅު - ގއ. ގެމަނަފުށީ ބީޗްވިލާ، އިސްމާއީލް ޔާމީން
ވަރަށް ޅަ އުމުރުފުޅުގައި މަސްވެރިކަމުގެ ދާއިރާއަށް ނުކުމެ މަސްވެރިކަމުގެ ހަރަކާތްތަކުގައި ޔާމީން ސާދަ އަހަރު ހޭދަ ކޮށްފައިވެއެވެ. ކެޔޮޅަކަށްވުމަކީ މަހަށް ފުރަތަމަ ނުކުތްއިރުވެސް ޔާމީންގެ އުންމީދެވެ. އޭނާއަކީ ވާރު-1 ދޯނީގެ ކެޔޮޅެވެ.
އެންމެ ތަޖުރިބާކާރު ކެޔޮޅު - ކ. ގާފަރު، ނޯމާ، ޔައުގޫބު އަބްދުލް ކަރީމް
ޔައުގޫބަކީ ރާއްޖޭގައި އެއްވެސް ޒަމާނީ ވަސީލަތެއް ބޭނުން ނުކޮށް، ރިޔަލު ދޯނީގައި މަސްވެރިކަން ކޮށް އުޅުނު ޒަމާނުއްސުރެ މިއަދާ ހަމައަށް މަސްވެރިކަމުގައި ދެމި ހުރި މީހެކެވެ.
އެންމެ ތަޖުރިބާކާރު ކެޔޮޅު - ގދ. ފަރެސްމާތޮޑާ، ސެއްލަ ހުސައިން މަނިކު
މަސްވެރިކަމުގައި ހުސެން މަނިކު ވަނީ 43 އަހަރު ހޭދަކޮށްފައެވެ. މި މުއްދަތުގެ ތެރޭގައި ހަތް ދޯންޏެއްގައި ކެޔޮޅުކަން އޭނާ ކޮށްފައިވެއެވެ. ހުސެން މަނިކު މިހާރު މަސައްކަތްކުރަނީ ގދ. ފަރެސްމާތޮޑާ ސަފީނާ ދޯނީގެ ކެޔޮޅަކަށެވެ.
