ޖަޕާނާއި ގުޅިގެން އަގު އެއްކުރި މަހުގެ ބާވަތްތައް ރާއްޖޭގައި އުފެއްދުމާއި ގުޅޭގޮތުން މަޝްވަރާކޮށްފިއެވެ.
ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗީ މިދޮރީ މަސްވެރިކަމާއި ބެހޭ ވަޒީރު އަހުމަދު ޝިޔާމް އާއި އެކު މަސްވެރިކަމާއި ބެހޭ ވުޒާރާގައި ބޭއްވި ބައްދަލުވުމެއްގައި ރާއްޖޭގައި އުފެއްދިދާނެ، އަގު އެއްކުރި މަހުގެ ތަފާތު އުފެއްދުންތަކާއި ގުޅޭގޮތުން މަޝްވަރާކޮށްފައިވެއެވެ. އަދި ދެ ޤައުމު ގުޅިގެން މިކަމުގައި ކުރެވިދާނެ މަސައްކަތްތަކާއި ގުޅޭގޮތުން ވަނީ މަޝްވަރާކޮށްފައެވެ.
Ambassador of Japan to the Maldives H.E. Takeuchi Midori paid a courtesy call on Minister Ahmed Shiyam.
Discussion was focused on possible collaborations in diversifying the production of value-added fish and fishery products processed in the Maldives. pic.twitter.com/riyjQTipGQ
— Ministry of Fisheries and Ocean Resources (@MFORmv) December 26, 2023
ވެލިއު އެޑަޑް ޕްރޮޑަކްޓް ނުވަތަ އަގު އެއްކުރި މަހުގެ ބާވަތްތަކަކީ ދަޅުގައާއި ޕޯޗްގައި އެކި ގޮތްގޮތަށް ބަންދުކޮށްފައި ހުންނަ މަހުގެ އުފެއްދުންތަކެވެ. އޭގެތެރޭގައި ދަޅުމަހާއި ހިކިމަހާއި، މަހުގެ އެކި ބައިތަކުން އުފައްދާ ތަފާތު ބާވަތްތައް ހުރެއެވެ. ނަމަވެސް ރާއްޖެއިން އާއްމުގޮތެއްގައި މަސް ބޭރުކުރަނީ އަގު އެއްކުރި މަހުގެ އުފެއްދުންތަކުގެ ބަދަލުގައި ގަނޑުކުރި ރޯމަހުގެ ގޮތުގައެވެ.
ސަރުކާރުންދަނީ އަގު އެއްކުރި މަހުގެ އުފެއްދުންތައް ރާއްޖޭގައި އުފައްދާ މިންވަރު އިތުރުކޮށް، އެކި ޤައުމުތަކަށް އެކްސްޕޯޓުކޮށްގެން މަސްވެރިކަމުން ލިބޭ ނަފާ އިތުރުކުރުމަށް ގިނަ މަސައްކަތްތަކެއް ކުރުމަށް ނިންމާފައެވެ.
އެގޮތުން މަސްވެރިންގެ ދުވަހުގެ ރަސްމީ ޖަލްސާގައިވެސް ރައީސުލްޖުމްހުރިއްޔާވަނީ މިކަމާއި ގުޅޭގޮތުން ވާހަކަފުޅުދައްކަވާފައެވެ. ރައީސް ޑރ. މުހައްމަދު މުއިއްޒު ވިދާޅުވީ، ދިވެހި މަސްވެރިން ބާނާ މަސް އެހެން ޤައުމުތަކުގެ މަސް ކުންފުނިތަކުން ގަނެގެން، އަގު އެއްކުރި މަހުގެ އުފެއްދުންތައް ބާޒާރަށް ނެރެގެން ބޮޑު ފައިދާއެއް ނަގަމުންދާކަން ފާހަގަކުރައްވާފައެވެ.
ނަމަވެސް މި ސަރުކާރުން ބޭނުންވަނީ އެ ފައިދާ ދިވެހި މަސްވެރިންނަށް ލިބޭނެގޮތަކަށް މި ނިޒާމު ބަދަލުކުރަންކަމަށާއި، އަދި އެކަން ކުރާނެ ކަމުގެ ޔަޤީންކަން ދެއްވާކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ދިވެހިރާއްޖޭގައި އުފައްދާ އަގު އެއްކުރި މަހުގެ މިންވަރު އިތުރުކުރުމަށް، މި ދާއިރާއިން އިންވެސްޓް ކުރުމަށް އެދޭ ކުންފުނިތަކަށް ފަހި ފުރުޞަތުތަކެއް ހޯދައިދެވޭނެކަމަށެވެ. އަދި މަހުގެ އުފެއްދުންތައް އުފައްދާ ކުދި އަދި މެދުފަންތީގެ ވިޔަފާރިތަކަށް މާލީގޮތުން އެހީތެރިކަން ދެވޭނެ އިންތިޒާމުތަކެއް ހަމަޖައްސައި ދެވިގެންދާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
