=
ރާއްޖޭގެ ކަނޑުގެ ސަރަހައްދުން ބޭރުގައި ހަރަކާތްތެރިވުމަކީ އަދި މަސްވެރިކަން ކުރުމަނީ ގާނޫނުން މަނާ ކަމެއް ކަމުގައި ފިޝަރީޒް މިނިސްޓްރީން ބުނެފިއެވެ.
ފިޝަރީޒް މިނިސްޓްރީން މިއަދު ކުރި ޓުވީޓެއްގައި ބުނީ، މަސްވެރިކަން ކުރާ އުޅަނދުތަކުން ރާއްޖޭގެ ކަނޑުގެ ސަރަހައްދުން ބޭރުގައި އަދި އެހެން އެއްވެސް ގައުމެއްގެ ސިޔާދަތީ ބާރު ހިނގާ ސަރަހައްދަކަށް ވަދެ މަސްވެރިކަން ކުރުމަކީ ރާއްޖޭގެ މަސްވެރިކަމުގެ ގާނޫނުން މަނާކަމެއް ކަމަށެވެ. ދިވެހިރާއްޖޭގެ ކަނޑުގެ ސަރަހައްދުން ބޭރުގައި މަސްވެރިކަން ކުރުމަކީ ނުވަތަ ހަރަކާތްތެރިވުމަކީ 75،000 ރުފިޔާއިން އަދި އެހެން ގައުމެއްގެ ސިޔާދަތީ ބާރު ހިނގާ ސަރަހައްދެއްގައި މަސްވެރިކަންކުރުން ނުވަތަ ހަރަކާތްތެރިވުމަކީ 150،000 ރުރިޔާއިން ޖޫރިމަނާ ކުރެވޭނެ ކަމެއްކަމަށް ގަވާއިދު ނަންބަރު R-139/2022 (ކަނޑުމަހުގެ މަސްވެރިކަން ރާވައި، ހިންގައި، ބެލެހެއްޓުމަާ ގުޅޭ ގަވާއިދު) ބަޔާންކޮށްފައިވެއެވެ.
ރާއްޖޭގެ އުތުރުގެ ބައެއް މަސްވެރިން ބައެއް ފަހަރު ރާއްޖޭގެ ކަނޑުގެ ސަރަހައްދުން ބޭރުގައި މަސްވެރިކަންކުރާކަމަށް މައުލޫމާތު ލިބެއެވެ.
ރާއްޖޭގެ ކަނޑުގެ ސަރަހައްދުން ބޭރުން މަސްވެރިކަން ކުރުމަކީ ގާނޫނުން މަނާ ކަމެއް ކަމުގައި ފިޝަރީޒް މިނިސްޓްރީން ބުނެފައި މިވަނީ، ރާއްޖެއާ އިންޑިއާގެ މަޝްހަރު ހޫނުވެފައިވާ ދަނޑިވަޅެއްގައެވެ. އެގޮތުން، އެ ގައުމުގެ ބޮޑު ވަޒީރު ނަރެންދްރަ މޯދީއަށް ރާއްޖޭގެ ބައެއް ޑެޕިއުޓީ މިނިސްޓަރުން ފާޑުކިޔުމުން އެ ގައުމުންދަނީ ރާއްޖެ ބޮއިކޮޓްކުރަން ގޮވާލައި ކެމްޕެއިނެއް ކުރިއަށް ގެންދަމުންނެވެ.
