މިޔަރު ހަމަލާދިނުމު ހާދިސާތައް ރެކޯޑު އަދަދަކަށް އިތުރުވެއްޖެ

މިދިޔަ އަހަރަކީ މިޔަރު ހަމަލާދިނުމު ހާދިސާތައް ރެކޯޑު އަދަދަކަށް އިތުރުވި އަހަރެއް ކަމަށް ޓްރެކިންގ ޝާކްސް ޑޮޓްކޮމް އިން ހާމަކޮށްފިއެވެ.

އެގޮތުން މިދިޔަ އަހަރު މިޔަރު ހަމަލާދިނުމުގެ 84 ހާދިސާއެއްް ހިނގާފައިވާއިރު، މީގެތެރެއިންް 18 ހާދިސާއެއްގައި އިންސާނުންގެ ފުރާނައަށް ގެއްލުންވެފައިވެއެވެ. މިއީ ފާއިތުވީ 20 އަހަރު ދުވަހުގެތެރޭގައި މިހާ ގިނަ ހާދިސާތައް ހިނގާފައިވާ ފުރަތަމަ ފަހަރުކަމަށްވެސް ޓްރެކިންގ ޝާކްސްއިން ބުނެއެވެ. އަދި މީގެތެރެއިން އިންސާނުން އެއްްކޮށް މިޔަރު ކާލުމުގެ ހާދިސާތައްވެސް މަދުނޫންކަން އެ ފަރާތުން ފާހަގަކުރެއެވެ.

އަދި މިފަދަ ނުރައްކާތެރި ހަމަލާތައް އިންސާނުންނަށް އެންމެ ގިނައިން ދޭ އެއް ބާވަތުގެ މިޔަރަކީ ގްރޭޓު ވައިޓް ޝާކް ކަމަށްވެސް ޓްރެކިންގ ޝާކްސްއިން ބުނެއެވެ.

18 މީހަކު މިޔަރު ހަމަލާދިނުމުގެ ސަބަބުން މަރުވެފައިވާއިރު، މީގެތެރެއިން 4 މީހުންނަކީ ރާޅާ އެޅުންތެރިންނެވެ. އޭގެތެރޭގައި ގިނައީ އޮސްޓްރޭލިއާގައި ހިނގި ހާދިސާތަކެވެ.

މިޔަރު ހަމަލާދިނުމުގެ ހާދިސާތައް އިތުރުވުމަށް މެދުވެރިވި ސަބަބުތަކުގެތެރޭގައި، ބެލެހެއްޓުމެއްނެތި ކުރާ މަސްވެރިކަމުގެ ސަބަބުން މިޔަރު ކެއުމަށް ބޭނުންވާ މަސްތައް ކަނޑުތަކުން މަދުވުމާއި، ކަނޑުތައް ހޫނުވުމުގެ ސަބަބުން އެއްގަމާއި ކައިރިއަށް މިޔަރުތައް ދަތުރުކުރުމާއި، މިޔަރުގެ އާބާދީ ނިސްބަތުން އިތުރުވުން ހިމެނެއެވެ.