މަސްކަޑަ ފިޔަވައި ރ. އިނގުރައިދޫ ބަނދަރުގެ އެހެން އެއްވެސް ތަނެއްގައި އެއްވެސް ބާވަތެއްގެ މަހެއް ނުވަތަ މަސްތަކެއް ކެނޑުމާއި ވިއްކުން މަނާކޮށްފިއެވެ.
މިކަން މަނާކޮށްފައިވަނީ އިނގުރައިދޫ ކައުންސިލުން އާއްމުކޮށްފައިވާ އެ ރަށު ބަނދަރު ބެލެހެއްޓުމާއި ބެހޭ ގަވާއިދުގައެވެ.
މި ގަވާއިދުގައިވަނީ ބަނދަރު ބެލެހެއްޓުމުގައި އަމަލުކުރާނެ ގޮތްތަކާއި މަނާކޮށްފައިވާ ކަންތައްތަކަށް އަޅާނެ ފިޔަވަޅުތައް ބަޔާންކޮށްފައެވެ. ގަވާއިދުގައި މަސްވެރިކަމާއި ގުޅުން ހުރި ބައިތަކަށް ބަލައިލާއިރު، މަސްކަނޑަ ފިޔަވައި ބަނދަރުގެ އެހެން އެއްވެސް ހިސާބެއްގައި މަސް ކެނޑުމާއި މަސް ވިއްކުން ވަނީ މަނާކޮށްފައެވެ.
މީގެ އިތުރުން މަސްކަނޑައަށް މަސް ގެންދިޔުމަށް ނުވަތަ އުފުލުމުގައި ބަނދަރުގެ އެއްގަމު ތޮއްޓާއި ބަނދަރު ސަރަހައްދުގައި އަޅާފައިވާ ގާތައް ހަޑިވާގޮތަށް އެކަން ކުރުންވެސް ވަނީ މަނާކޮށްފައެވެ. އަދި އެފަދަ ހާލަތެއްގައި ހަޑިވާ ތަނެއް ސާފުކުރުމަކީ އެކަންކުރި ފަރާތެއް ކުރަންޖެހޭނެ ކަމެއް ކަމަށް ގަވާއިދުގައިވެއެވެ.
ބަނދަރުތެރޭގައްޔާއި ބަނދަރު ސަރަހައްދުގައި އެން ކޮށްޓާއި ދިރޭމަސް ކޮށީގައި ބަހައްޓައިގެން ދާއިމީކޮށް ގެންގުޅުންވަނީ މަނާކޮށްފައެވެ. އެހެން ނަމަވެސް މޫސުމީ މަސްވެރިކަމަށް މަސްވެރިން ގެންގުޅޭ ދިރޭ މަސް ދޯނީގަައާއި ދޯނީގައި ހަރުކޮށްފައި ހުންނަ ދާތަކުގައި ވަގުތީ ގޮތަށް ގެންގުޅެވޭނެ ކަމަށް ގަވާއިދުގައި ބުނެފައިވެއެވެ.
ގަވާއިދާ ހިލާފުވާ ފަރާތްތައް ފުރަތަމަ ފަހަރަށް ނަސޭހަތް ދިނުމަށް ފަހު، ކުށް ތަކުރާރުކޮށްފިނަމަ 500ރ -1000ރ އާއި ދެމެދުގެ އަދަދަކުން ޖޫރިމަނާކުރެވޭނެއެވެ. އަދި ކުށް ތަކުރާރުކުރާ ވަރަކަށް ޖޫރިމަނާ އިތުރުވަމުން ދާނެއެވެ. އެގޮތަށް ގޮސް 5000ރ އާ ހަމައަށް ޖޫރިމަނާ އިތުރުވެ، އެއަށް ފަހު ކުށް ތަކުރާރުކުރާ ކޮންމެ ފަހަރަކު 5000ރ އިން ޖޫރިމަނާ ކުރުމުގެ އިހްތިޔާރު ކައުންސިލަށް އޮވެއެވެ.
