މަސްވެރިންގެ އަތުން ގަންނަ މަހަށް 48 ގަޑިއިރުގެ ފައިސާ ދެއްކުމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދު މި ދައުރުގެ ކުރީކޮޅު ފުއްދަވާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
މިނިސްޓަރު ޝިޔާމް އެެހެން ވިދާޅުވީ، ރައްޔިތުންގެ މަޖިލިހުގެ މިއަދުގެ ޖަލްސާގައި ދުވާފަރު ދާއިރާގެ އެމްޑީޕީގެ މެމްބަރު އިސްމާއިލް އަހުމަދު ކުރެއްވި ސުވާލަކަށް ޖަވާބުދެއްވަމުންނެވެ.
މެންބަރު އިސްމާއިލް ސުވާލުކުރެއްވީ، މަސް ކިރާތާ 48 ގަޑިއިރުގެ ތެރޭގައި މަހުގެ ހަމަ އަގު މަސްވެރިންނަށް ދޭނެ ކަމަށް ރައީސް ވައުދުވެވަޑައިގެންފައިވީ ނަމަވެސް 48 ދުވަސް ފަހަނައަޅައި ދިޔައިރު ވެސް އެ ފައިސާ ދައްކާފައިނުވާތީ 48 ގަޑިއިރު ތެރޭގައި ފައިސާ ދެވޭނެ އުސޫލު އެކުލަވާލައި ދާއިމީ ހައްލެއް ގެނައުމަށް ގެންގުޅުއްވާ ވިސްނުމަކީ ކޮބައިތޯއެވެ.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ސްވެރިންނާ ގުޅޭ ވައުދުތައް މި ސަރުކާރުން ދައުރުގެ ކުރީކޮޅު ފުއްދަވާނެ ކަމަށެވެ.
"އިރާދަކުރެއްވިއްޔާ ދައުރުގެ ކުރީކޮޅު 48 ގަޑިއިރު ތެރޭގައި ފައިސާ ދެވޭ ގޮތަށް މަސައްކަތް ގެންދާނަން،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ، ކުރީ ސަރުކާރުތަކުން ވައުދު ފުއްދަނީ ދައުރުގެ ފަހުކޮޅާއި އިންތިހާބުތަކާ ދިމާކޮށް ކަމަށާއި މި ސަރުކާރުން އެހެން ނުވާނެ ކަމަށެވެ. އަދި މަސްވެރިންނަށް ފައިސާ ނުދެވި ލަސްވަނީ، މަހުގެ އަގަށް ކުރީ ސަރުކާރުން ގެނައި ބަދަލާއި މާލީ ދަތިކަން ކަމަށެވެ.
