ސެންޓްރަލް ޖަލެއް ހެދުމަށް ސަރުކާރުން ނިންމައިފި

ރާއްޖޭގައި ސެންޓްރަލް ޖަލެއް ހެދުމަށް ސަރުކާރުން ނިންމައިފިއެވެ.

އިސްކަންދަރު ކޮށީގައި މިހާރު ބާއްވަމުން އަންނަ ނޫސްވެރިންގެ ބައްދަލުވުމުގައި ހޯމްލޭންޑް މިނިސްޓަރު އަލީ އިހްސާން ވިދާޅުވީ، ސަރުކާރުގެ ވިސްނުމަކީ، ރާއްޖޭގައި ހުރި ވަކިވަކި ޖަލުތަކުގެ ބަދަލުގައި ސެންޓްރަލް އެއް ޖަލު ހެދުން ކަމަށެވެ.

"އެކަން (ސެންޓްރަލް ޖަލެއް)، އެ ގޮތަށް ކުރުމަށް (ސަރުކާރުން) މިހާރު ނިންމާފައިވަނީ" މިނިސްޓަރު އިހްސާން ވިދާޅުވިއެވެ.

އިހްސާން ވިދާޅުވީ، ސެންޓްރަލް ޖަލެއްގެ އެންމެ ބޮޑު ބޭނުމަކީ، ބަންދުކުރާ މީހުން ރިހެބިލިޓޭޓްކޮށް އަނބުރާ މުޖުތަމައަށް ގެނެސް، އެ މީހުންނަކީ ފައިދާކުރަނިވި ބަޔަކަށް ހެދުން ކަމަށެވެ.

އިހްސާން ވިދާޅުވީ، އަމާޒަކީ ޖަލުތަކުގައި މީހުން ގެންގުޅެން ނުޖެހޭ މާހައުލެއް ގާއިމްކުރުން ކަމަށާއި ރިހެބިލިޓޭޝަން ޕްރޮގްރާމްތައްވެސް ފަރުމާކުރާނީ އެކަމަށް އިސްކަންދީގެން ކަމަށެވެ.

މިހާރު ރާއްޖޭގައި ހުރީ ތިން ޖަލެވެ. އެއީ، މާފުށީ ޖަލާއި ހިންމަފުށީގައި ހުންނަ އައްސޭރި ޖަލާއި ހުޅުމާލޭ ޖަލެވެ. އޭގެ އިތުރުން ދޫނިދޫގައި ފުލުހުންގެ ޖަލެއް ހުރެއެވެ.