މިއަހަރުގެ ފުރަތަމަ 2 މަސް ދުވަސްތެރޭ ގްރީން ފަންޑަށް 202 މިލިއަން ރުފިޔާ ޖަމާވެފައިވާ ކަމަށް މާލީ ވުޒާރާއިން ހާމަކޮށްފިއެވެ.
މާލީ ވުޒާރާއިން ނެރެފައިވާ މިއަހަރުގެ ފެބްރުއަރީމަހުގެ ގްރީން ފަންޑު ރިޕޯޓުގައިވާގޮތުން މިދިޔަ އަހަރު ނިމުނު އިރު ފަންޑުގައި ހުރީ 1.1 ބިލިއަން ރުފިޔާއެވެ. އަދި މި އަހަރުގެ ޖަނަވަރީމަހު 99 މިލިއަން ރުފިޔާ ގްރީން ފަންޑަށް ޖަމާވެފައިވާއިރު، ފެބްރުއަރީމަހު އެ ފަންޑަށްވަނީ 102 މިލިއަން ރުފިޔާ ޖަމާވެފައެވެ.
މާލީ ވުޒާރާއިން ވިދާޅުވީ މިއަހަރުގެ ފުރަތަމަ 2 މަސްދުވަސްތެރޭ އެ ފަންޑުންވަނީ އެކި މަޝްރޫޢުތަކަށް 94 މިލިއަން ރުފިޔާ ޚަރަދުކޮށްފައެވެ.
މިދިޔަ ފެބްރުއަރީމަހުގެތެރޭ ގްރީން ފަންޑުންވަނީ 10 މަޝްރޫޢަކަށް ޚަރަދުކޮށްފައެވެ. މީގެތެރެއިން އެންމެ ބޮޑު ހޭދައެއްކޮށްފައިވަނީ ގްރޭޓަރ މާލެ ވޭސްޓު ޓު އެނަރޖީ ޕްރޮޖެކްޓަށެވެ. އެ މަޝްރޫޢުއަށް ގްރީނ ފަންޑުން ފެބްރުއަރީމަހުގެތެރޭ ވަނީ 14 މިލިއަން ރުފިޔާވަނީ ޚަރަދުކޮށްފައެވެ.
ގްރީން ޓެކުހަކީ ތިމާވެއްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށް، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކުހެކެވެ. މި ޓެކްސް ރިސޯޓްތަކާއި، ގެސްޓްހައުސްއާއި، ސިޓީ ހޮޓާތަކާއި، ސަފާރީތަކަށް އަންނަ ފަތުރުވެރިންވެސް ދައްކަންޖެހެއެވެ.
އެގޮތުން ރިސޯޓުތަކާއި ސަފާރީތަކަށް އަންނަ ފަތުރުވެރިން، އެއިން ތަނެއްގައި ނުވަތަ އުޅަނދެއްގައި ހޭދަކުރާ ކޮންމެ ދުވަހަކަށް، މީހަކަށް 6 ޑޮލަރުގެ ރޭޓުން ގްރީން ޓެކްސް ދައްކަން ޖެހެއެވެ.
މީހުން ދިރިއުޅޭ ރަށްރަށުގައި ހިންގާ ހޮޓާތަކާއި، ޓޫރިސްޓް ގެސްޓް ހައުސްތަކުގެ ތެރެއިން 50 ކޮޓަރިއަށްވުރެ ގިނަ ކޮޓަރި ރަޖިސްޓަރީކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ދުވާލަކަށް 6 އެމެރިކާ ޑޮލަރު، އަދި މީހުން ދިރިއުޅޭ ރަށްރަށުގައި ހިންގާ ހޮޓާތަކާއި، ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓަރީކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ދުވާލަކަށް 3 އެމެރިކާ ޑޮލަރު، ގްރީން ޓެކުހުގެގޮތުގައި ނަގައެވެ.
