ވައިގަދަވެ ވިއްސާރަވާތީ ބްރިޖުން ދަތުރު ކުރާއިރު ސަމާލުވާން މޯލްޑިވްސް ޕޮލިސް ސާވިސްއިން އިލްތިމާސްކޮށްފިއެވެ.
ފުލުހުން ބުނީ، މި ދުވަސްވަރަކީ ވައިގަދަ، ވިއްސާރަ ދުވަސްވަރަކަށް ވުމާއެކު، ސިނަމާލެ ބުރިޖު އަދި ހައިވޭއިން ދަތުރުކުރައްވާއިރު ތިމާއާއި އަނެކުންގެ ސަލާމަތާއި ރައްކާތެރިކަމަށް ބަލައިގެން އުޅަނދު ދުއްވުމަށް އިލްތިމާސްކުރާ ކަމަށެވެ.
އަދި ސައިކަލު ދުއްވާއިރު ކުޑަނަގައިގެން ނުދުއްވުމަށާއި ފަސޭހައިން ހަލާކުވެ ވަޔާދާ ފަދަ ކޯޓު ބޭނުންނުކުރުމަށާ އަދި ހެލްމެޓުވެސް ވަޔާ ނުދާނޭހެން ރަނގަޅަށް އެޅުމަށް ފުލުހުން ވަނީ އިލްތިމާސް ކޮށްފައެވެ.
އޭގެ އިތުރުން ފުލުހުން ބުނީ، އުޅަނދުގެ ލައިޓުތައް ދިއްލޭތޯ ބަލައި ސަލާމަތާއި ރައްކާތެރިކަން ކަށަވަރު ކޮށްގެން އުޅަނދު ދުއްވުމަށްވެސް އިލްތިމާސް ކުރާ ކަމަށެވެ.
މޫސުން ގޯސްވެ، މިރޭ ވަނީ ބ އަތޮޅުން ފެށިގެން މ އަތޮޅަށް އޮރެންޖު އެލާޓު ނެރެފައެވެ. އަދި މިވަގުތު ވަނީ ހއ. އަތޮޅުން ފެށިގެން ތ. އަތޮޅުގެ ނިޔަލަށް ޔެލޯ އެލާޓް ނެރެފައެވެ.
