ދިވެހިރާއްޖެއަށް މާލީގޮތުން އަޑިގަނޑަކާ ކުރިމަތިލާންޖެހިފައިވާ ދަނޑިވަޅުގައި، ހަރަދު ކުޑަ ކުރުމުގެ ގޮތުން މި ސަރުކާރުން އަޅަމުންދާ ފިޔަވަޅުތައް ފާހަގަކޮށް ވޯލްޑް ބޭންކުން މަރުހަބާ ކިޔައިފިއެވެ.
ރާއްޖެއާ ބެހޭގޮތުން ވޯލްޑް ބޭންކުން ތައްޔާރު ކުރި ރިޕޯޓު ކަމުގައިވާ ސްކޭލިން ބެކް އެންޑް ރިބިލްޑިންގް ބަފާސް' ހުށަހަޅައިދެމުން، ކަންޓްރީ ޑިރެކްޓަރު ފާރިސް ހ. ހަދާދު ޒާވޮސް ވިދާޅުވީ، ރާއްޖޭގެ މާލީ ހާލަތު އޮތީ ނާޒުކު ފައްތަރެއްގައިކަން ގަބޫލުކޮށް، ރާއްޖެއިން އަޅަން ފަށާފައި ވަނީ އެކަށީގެންވާ ރަނގަޅު ފިޔަވަޅުތަކެއް ކަމަށެވެ.
އެގޮތުން، ރާއްޖޭގެ އުމްރާނީ ތަރައްގީގެ މަޝްރޫއުތައް ތަރުތީބު ކުރުމާއި ޕަބްލިކް އިންވެސްޓްމަންޓް މެނޭޖްކުރުން ހަރުދަނާ ކުރުމާއި، ޓާގެޓެޑް ސަބްސިޓީ ދޭން ފެށުމުގެ އިތުރުން ސިއްހީ ދާއިރާއަށް ހަރަދުކުރާ ގޮތް ހަރުދަނާ ކޮށްފައިވާކަން ފާރިސް ފާހަގަ ކުރެއްވިއެވެ.
އޭގެ އިތުރުން އޭނާ ފާހަގަ ކުރެއްވި ކަންތައްތަކުގެ ތެރޭގައި ހިމެނެނީ:-
- ދަރަނި މެނޭޖްކުރުމުގެ އުސޫލު ހަރުދަނާ ކޮށްފައިވާކަން
- ސަރުކާރު ކުންފުނިތައް އިސްލާހު ކޮށްފައިވާކަން
- ސަރުކާރުން އާމްދަނީ ހޭދަކުރާގޮތް ހަރުދަނާ ކޮށްފައިވާ ކަމެވެ.
ފާރިސްް ވިދާޅުވީ، ރާއްޖޭގެ މާލީ ހާލަތު އޮތް ގޮތް ސަރުކާރަށް އެންގުމާއެކު، އެކަމަށް ސަރުކާރުން ވަނީ އަވަސް ފިޔަވަޅުތަކެއް އަޅަން ފަށާފައެވެ. އަދި ދައުލަތުގް ހަރަދުތައް ކުޑަ ކޮށްފައިވާ ކަމަށް ފާރިސް ވިދާޅުވިއެވެ.
