މިފްކޯއަށް ކަންނެލި ކިރަން ފަށާނީ ކަނޑުއޮތްގިރި އޮޕަރޭޝަނަށް ގެނެވުމުން ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މަސްވެރިކަމާބެހޭ ވުޒާރާއިން އިއްޔެ ބޭއްވި ނޫސްވެރިންގެ ބައްދަލުވުމުގައި "މަސްވެރިން އޮންލައިން"އިން ކުރި ސުވާލަކަށް ޖަވާބު ދެއްވަމުން މިނިސްޓަރ ޝިޔާމް ވިދާޅުވީ، މިވަގުތު މިފްކޯއަށް ބޮޑުކަންނެލި ނުކިރާ ކަމަށެވެ.
މިފްކޯއަށް ބޮޑުކަންނެލި ގަންނަން ފެށުމާއި، ބޮޮޑު ކަންނެލީގެ އަގަކީ 80-100 ރުފިޔާ ކަމަށް ކަނޑައެޅުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެއްކަން ފާހަގަ ކުރައްވައަމުން ޝިޔާމް ވިދާޅުވީ ރައީސްގެ މި ފަސް އަހަރުގެ ކުރީކޮޅު މަސްވެރިކަމާ ގުޅޭ ވައުދުތައް ފުއްދޭތޯ މަސައްކަތް ކުރައްވާނެ ކަމަށެވެ.
އެގޮތުން، ކަންނެލީގެ މަސްވެރިކަން ކުރާ ފަރާތްތަކުން މިފްކޯއަށް ގަންނައިރު ރައީސް ވިދާޅުވެފައިވާ އަގުތަކުގައި ގަނެވޭނެ ގޮތްތައް ފަހި ކޮށްދޭނެ ކަމަށް މިނިސްޓްރު ވިދާޅުވިއެވެ.
ރައީސް މުއިއްޒު ވައުދުވެވަޑައިގެންފައި ވަނީ، މިފްކޯއަށް ބޮޑުކަންނެލި ގަންނަން ފެށުމާއި، ބޮޮޑު ކަންނެލީގެ އަގަކީ 80 ރުފިޔާ ކަމަށާއި، އޭ-ގްރޭޑް ނަމަ 100 ރުފިޔާ ކަމަށް ހަމަޖައްސައިދޭނެ ކަމަށެވެ.
މި ސަރުކާރުން މަސްވެރިކަމުގެ ސިނާއަތަށް 28 ވައުދު ވިއެވެ. އަދި އޭގެ ތެރެއިން ބައެއް ވައުދުތައް މިހާރުވަނީ ފުއްދާފައެވެ.
