ރާއްޖޭގެ މަސްވެރިކަމުގެ ސިނާއަތުގައި ހުރި ފުރުސަތުތަކުގެ މައުލޫމާތު ޗައިނާގެ ފުޖިއާން ޕްރޮވިންސްގެ ޑިޕާޓުމަންޓު އޮފް ފިޝަރީޒް ރިސޯސަސްގެ މަތީ ފަންތީގެ ވަފުދާއި ހިއްސާކޮށްފިއެވެ.
މިއަދު މަސްވެރިކަމާއި ބެހޭ ވުޒާރާގައި ބޭއްވި މި ބައްދަލުވުމުގައި ފުޖިއާން ޕްރޮވިންސްގެ ވަފުދުގެ ބޭފުޅުންގެ އިތުރުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގު ލީޒިން ބައިވެރިވެވަޑައިގެންނެވިއެވެ.
ވުޒާރާގެ އިސްވެރިން މި ބައްދަލުވުމުގައި ބައިވެރިވެފައިވާއިރު، ވަފުދަށް މައުލުމާތުދިނުމަށް އިސްކޮށް ހުންނެވީ މަސްވެރިކަމާއި ބެހޭ ވަޒީރު އަހުމަދު ޝިޔާމެވެ.
ވަޒީރު ވަނީ ރާއްޖޭގެ މަސްވެރިކަމުގެ ސިނާއަތް ގުޅިގެން ކުރިއެރުމަށް ހުރި ފުރުސަތުތަކުގެ މައުލޫމާތު ހިއްސާކޮށްފައެވެ. އެގޮތުން މެރިކަލްޗަރގެ ދާއިރާއިންނާއި މިދާއިރާއަށް ބޭނުންވާ ހުނަރާއި އިލްމު ތަރައްޤީކުރުމާއި ގުޅޭގޮތުން ވަނީ މަޝްވަރާކޮށްފައެވެ. ވަޒީރުވަނީ މިދާއިރާއިން ޗައިނާގެ އިންވެސްޓުމަންޓުތަކަށް މަރުހަބާ ކިޔާކަމަށް ވިދާޅުވެފައެވެ.
Minister Shiyam and senior officials of the Ministry met with the Chinese ambassador to the Maldives, Wang Lixin, and the senior officials delegation from the Department of Ocean and Fisheries Resources of Fujian Province, China. They exchanged discussions on the development of… pic.twitter.com/DxyQ6DnRws
— Ministry of Fisheries and Ocean Resources (@MFORmv) May 28, 2024
ފުޖިއާންއަކީ ޗައިނާގައި މަސްވެރިކަމުގައި ފާހަގަކޮށްލެވޭ ޕްރޮވިންސްއެކެވެ. ފުޖިއާން ޕްރޮވިންސްގެ މި ވަފުދުގެ މި ދަތުރަކީ މަސްވެރިކަމާއި ކަނޑުތަކާއި ގުޅޭގޮތުން މައުލޫމާތު ބަދަލުކޮށް، ގުޅުންތައް ބަދަހިކޮށް، މަސްވެރިކަން ކުރިއެރުވުމުގައި ގުޅިގެން މަސައްކަތްކުރުމަށް ހުރި ފުރުސަތުތައް ބެލުމަށް ކުރާ ދަތުރެއް ކަމަށް މަސްވެރިކަމާއި ބެހޭ ވުޒާރާއިން ވިދާޅުވެއެވެ.
ރާއްޖެއާއި ޗައިނާ އާއި ދެމެދު މިނިވަން ވިޔަފާރީގެ އެއްބަސްވުމެއް ގާއިމްކޮށްފައިވާއިރު، މިއަހަރުތެރޭގައި މި އެއްބަސްވުމަށް އަމަލުކުރާ ފަށާނެކަމަށް ސަރުކާރުން ވަނީ ވިދާޅުވެފައެވެ. މި އެއްބަސްވުމުގެ ދަށުން 296 ބާވަތެއްގެ ސީފުޑު އެއްވެސް ޓެރިފަކާއި ނުލައި ރާއްޖެއިން ޗައިނާއަށް އެކްސްޕޯޓުކުރެވޭނެއެވެ.
އެހެންކަމުން ޗައިނާގެ އެކި ޕްރޮވިންސްތަކުން ކުރާ މިފަދަ ދަތުރުތަކަކީ މަސްވެރިކަމުގައި ހުރި ފުރުސަތުތައް ދެނެގަތުމަށް މުހިއްމު ދަތުރުތަކެކެވެ.
