ނިލަންދޫ މަސް ފެކްޓަރީގެ އަމަލީ މަސައްތަކް ވަރަށް އަވަހަށް ފެށިގެންދާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު އަޙްމަދު ޝިޔާމް މިހެން ވިދާޅުވީ ރައްޔިތުންގެ މަޖިލީހުގެ ނިލަންދޫ ދާއިރާގެ ޢިއްޒަތްތެރި މެންބަރު ފާޠިމަތު ސަޢުދާއާއެކު ބޭއްވި ބައްދަލުކުރެއްވުމުގައެވެ.
މި ބައްދަލުކުރެއްވުން އޮތީ މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގައި އިއްޔެ މެންދުރުގެ ވަގުތެއްގައެވެ.
މި ބައްދަލުކުރެއްވުމުގައި ނިލަންދޫގައި އެޅުމަށް އިޢުލާނުކޮށްފައިވާ މަސްފެކްޓަރީގެ މަސައްކަތް ފެށުމަށް ވުޒާރާއިން ވަމުންދާ ތައްޔާރީތައް މެންބަރު ސަޢުދާ އޮޅުންފިއްލެއްވިއެވެ. އަދި މަސްފެކްޓަރީ އަޅާ ސަރަހައްދުގައި ހަދާފައިވާ މަހުގެ އުފެއްދުންތައް ތައްޔާރުކުރާ ތަންތަން އެހެންތަނަކަށް ބަދަލުކުރުމުގައި ދެވެން އޮތް އެހީތެރިކަމާ ގުޅޭގޮތުންވެސް މަޝްވަރާ ކުރެއްވިއެވެ.
މަސްވެރި ސިނާއަތް ތަރައްގީކުރުމަށް ވުޒާރާއިން ކުރަމުންދާ މަސައްކަތްތަކުގެ މަޢުލޫމާތު ވަޒީރު އަޙްމަދު ޝިޔާމް، މެންބަރު ސަޢުދާއާ ހިއްސާކުރެއްވިއެވެ. އެގޮތުން މި ސަރުކާރުން އަލަށް އަޅާ ސްޓޯރޭޖާއި މަސް ޕްރޮސެސްކުރާ ފެސިލިޓީގެ މައުލޫމާތު އެރުވިއެވެ. ނިލަންދޫގެ މަސް ފެކްޓަރީގެ މައުލޫމާތު ހިއްސާކުރައްވައި ވަޒީރު ވިދާޅުވީ މިމަހުގެ 27-28 އަށް ޗައިނާ ކުންފުނީގެ ވަފުދަކާއެކު ވުޒާރާގެ ފަންނީ ބޭފުޅުން ޅ. ފެލިވަރާއި، ފ. ނިލަދޫއާއި ގދ. ފިޔޯރީއަށް ޒިޔާރަތް ކުރުމަށް ހަމަޖެހިފައިވާ ކަމަށެވެ. މިދަތުރުގެ ބޭނުމަކީ ފެކްޓަރީތަކުގެ މަސައްކަތްތައް ފެށުމުގެ ގޮތުން ވާންޖެހޭ ތައްޔާރީތައް ދެނެގަތުން ކަމަށާއި މި ފެކްޓަރީތައް އެޅުމުގެ އަމަލީ މަސައްކަތްތައް ވަރަށް އަވަހަށް ފެށިގެންދާނެކަމަށް ވަޒީރު ވިދާޅުވިއެވެ.
