އީކުއޭޓަރ އެންގްލާސް ޓީމުން 75 ކިލޯގެ ވޮށިމަހެއް ބާނައިފި

ގދ. ފަރެސްމާތޮޑާގައި މުނިފޫހިފިލުވުމަށް މަސްވެރިކަން ކުރާ އީކުއޭޓަރ އެންގްލާސް މަސްވެރިންގެ ޓީމަކުން 75 ކިލޯގެ ވޮށިމަހެއް ބާނައިފިއެވެ.

މި ވޮށިމަސް އެޓީމުން ބާނާފައިވަނީ އިއްޔެ ހަވީރުގެ ވަގުތެއްގައެވެ.

މަސްވެރިން އެމްވީއަށް މައުލޫމާތު ދެމުން އީކުއޭޓަރ އެންގްލާސްގެ މެމްބަރަކު ބުނީ އިއްޔެ ހަވީރު އެޓީމުގެ 4 މެމްބަރުން މަހަށް ނުކުތީ ގދ. ކަޅެރެހާކައިރިއަށް ކަމަށާއި އެ ވޮށިމަސް ގަތީ އެ ސަރަހައްދުގައި ޑީޕް ޖިގްކުރަމުން ދަނިކޮށް ކަމަށެވެ.

އެ ވޮށިމަސް ގަތީ އީކުއޭޓަރ އެންގްލާސް ޓީމު މެމްބަރެއްކަމަށްވާ މަހުރޫސް، 500 ގްރާމްގެ ޖިގެއް ބޭނުންކޮށްގެން 250 ވަރަކަށް މީޓަރު ފުނުން ޖިގްކުރަމުންދަނިކޮށެވެ. އަދި ވޮށިމަސް ބޭނުނީ ދެ މެމްބަރަކުވެގެން ގާތްގަޑަކަށް ބައިގަޑިއިރުގެ މަސައްކަތުންކަމަށެވެ.

ވޮށިމަސްވަނީ ފަރެސްމާތޮޑާގައި ސީރާ މަސް ތައްޔާރުކުރާ ފަރާތަކަށް -/750 އަށް ވިއްކާލާފައެވެ.