މަސްވެރިކަމާއި ދަނޑުވެރިކަމުގެ ވަޒީރު އަޙްމަދު ޝިޔާމް، ފ. ނިލަންދޫ ކައުންސިލާއި ބައްދަލުކުރައްވައި، އެރަށުގެ މަސްވެރިކަމާ ގުޅޭ މުހިންމު މަޝްވަރާތަކެއް ކުރައްވައިފިއެވެ.
މި ބައްދަލުކުރެއްވުން އޮތީ މިއަދު މެންދުރުގެ ވަގުތެއްގައި ވަސްވެރި ވުޒާރާގައެވެ.
މި ބައްދަލުވުމުގައި ނިލަންދޫ ކައުންސިލްގެ ރައީސް ޢަލީ އަޙްމަދު ވަނީ ރަށުގެ އައިސްޕްލާންޓާއި މަސް ފެކްޓަރީއާ ގުޅޭ ކަންބޮޑުވުންތައް ހިއްސާކުރައްވާފައެވެ.
ކައުންސިލް ރައީސް ވިދާޅުވި ގޮތުގައި، ކުރިން ކައުންސިލުން އައިސްޕްލާންޓަށް ޑީސަލް ވިއްކުމަކީ ކައުންސިލަށް ވަރަށް ފައިދާކުރި ކަމެކެވެ. ނަމަވެސް މިހާރު ފެނަކައަށް ބަދަލުކޮށްފައިވާ އައިސްޕްލާންޓަށް ތެޔޮ ނުވިއްކޭ ކަމަށެވެ. އަދި އެ އައިސްޕްލާންޓް ހުއްޓިފައިވާތީ މަސްވެރިންނަށް ވަރަށް ދަތިވާކަން އޭނާ ފާހަގަކުރެއްވިއެވެ. އަދި ފެކްޓަރީގެ އެންމެ ފަހުގެ މަޢުލޫމާތު ބޭނުންވާ ކަމަށާއި، ފެކްޓަރީ އަޅާ ސަރަހައްދުގައި ބަދަލު ދީފައި ނަގަންޖެހޭ ތަންތަން ހުރިކަމަށް ވެސް ވިދާޅުވިއެވެ.
މި ބައްދަލުވުމުގައި ވަޒީރު ޝިޔާމް ވިދާޅުވީ، މި ސަރުކާރު އައި އިރު ގިނަ އައިސްޕްލާންޓްތައް ފެނަކައާ ހަވާލުކޮށްފައިވާ ކަމަށާއި، ނަމަވެސް ފެނަކައިން އައިސްޕްލާންޓްތައް ރަނގަޅަށް ނުބެލެހެއްޓޭކަން ފާހަގަކުރެވިފައިވާ ކަމަށެވެ. އެހެންކަމުން، މިފްކޯއަށް އައިސްޕްލާންޓްތައް ބަދަލުކުރުމުގެ މަސައްކަތް ދެ ދުވަހުގެ ތެރޭގައި ފެށޭނެ ކަމަށް ވަޒީރު އުންމީދު ފާޅުކުރެއްވިއެވެ.
އަދި މިފްކޯއިން އައިސްޕްލާންޓް ހިންގަން ފެށުމުން، ކައުންސިލުން އައިސްޕްލާންޓަށް ބޭނުންވާ ތެޔޮ ފޯރުކޮށްދިނުމަށް މަގުފަހިވާނެ ކަމަށް ގަބޫލުކުރައްވާ ކަމަށް ވިދާޅުވިިއެވެ.
ޖޫން 25 ގައި މިނިސްޓްރީގެ ޓީމެއް އެ ރަށަށް ޒިޔާރަތްކޮށްފައިވާ ކަމަށް ވެސް ވަޒީރު ވިދާޅުވިއެވެ. ވަޒީރު އިތުރަށް ވިދާޅުވީ، ފެކްޓަރީގެ މަސައްކަތް ކުރިއަށް ގެންދިއުމަށް ވަރަށް އިސްކަން ދެއްވާ ކަމަށާއި، އެއީ ސީދާ ރައީސް ޑރ. މުޢިއްޒުގެ ވިސްނުންފުޅުގެ ދަށުން އެ ސަރަހައްދުގައި މަސްވެރިކަން ތަރައްގީ ކުރުމަށް ހިންގާ ވަރަށް މުހިންމު މަޝްރޫއެއްކަމަށް ފާހަގަކުރެއްވިއެވެ.
މީގެ އިތުރުން، ރައްޔިތުންގެ މަޖިލީހުގެ ނިލަންދޫ ދާއިރާގެ ޢިއްޒަތްތެރި މެމްބަރު ފާޠިމަތު ސަޢުދާ އެއްބާރުލުން ލިބެމުންދާކަންވެސް ވަޒީރު ވިދާޅުވިއެވެ.
