އިންޑިއާގެ އެގްޒިމް ބޭންކުން ރާއްޖެއަށް ހަމަޖައްސަދީފައިވާ ލައިން އޮފް ކްރެޑިޓުގެ ދަށުން އައްޑޫ ސިޓީގައި ހިންގި ދެ މަޝްރޫއެއްގެ މަސައްކަތް ނިންމާ ރަސްމީކޮށް ދިވެހި ސަރުކާރާ ހަވާލުކުރެއްވުމަށް އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު އެ ސިޓީއަށް ވަޑައިގެންފިއެވެ.
އިންޑިއާގެ އެހީތެރިކަމާއިއެކު އައްޑޫގައި ހިންގާފައިވާ ދެ ޕްރޮޖެކްޓަކީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ ޕްރޮޖެކްޓާއި އެ ސިޓީގައި ފަތުރުވެރިކަމަށް ތަރައްގީކުރާ "ހަންކެޑެ" އާއި އެ ސިޓީގެ ގުޅިފައިވާ ރަށްތަކާއި ގުޅާލާ ހަންކެޑެ ބްރިޖްގެ މަސައްކަތެވެ.
މިއަދު ހެނދުނު ގަން އިންޓަނޭޝަނަލް އެއާޕޯޓުން އޭނާއަށް މަރުހަބާ ދެންނެވީ ފޮރިން މިނިސްޓަރު މޫސާ ޒަމީރާއި އައްޑޫ ސިޓީ މޭޔަރު އަލީ ނިޒާރު އަދި އައްޑޫއަށް ނިސްބަތްވާ މަޖިލިސް މެންބަރުންނެވެ.
ރަސްމީ ދަތުރުފުޅެއްގައި ރާއްޖެ ވަޑައިގެން އުޅުއްވާ އިންޑިއާގެ އެކްސްޓާނަލް އެފެއާސް މިނިސްޓަރު ޑރ. ޖައިޝަންކަރު ވަނީ މި ދަތުރުފުޅުގައި ރައީސް ޑރ.މުހައްމަދު މުއިއްޒުއާއި ބައްދަލުކުރައްވައި ދެ ގައުމުގެ ދެމެދު އޮތް ގުޅުން އިތުރަށް ވަރުގަދަ ކުރެއްވުމާއި ގުޅޭ ގޮތުން މަޝްވަރާ ކުރައްވާފައެވެ. މީގެއިތުރުން އިންޑިއާ އެހީގައި ކުރިއަށް ގެންދާ ތިލަމާލެ ބްރިޖް މަސައްކަތް ބައްލަވައިލައްވައި އެ ޕްރޮޖެކްޓް ހިންގާ އެފްކޮންސްގެ މުވައްޒަފުންނާއި ވެސް ބައްދަލު ކުރައްވާފައެވެ.
މީގެއިތުރުން މި ދަތުރުފުޅުގައި ޑރ.ޖައިޝަންކަރުވަނީ އިންޑިއާގެ އެހީގައި ރާއްޖޭގެ ރައްތަކުގައި ފެނާ ނަރުދަމާ އެޅުމަށް ހިންގުނު މަޝްރޫގެ ތެރެއިން 28 ރަށުގެ މަސައްކަތް ނިންމައި ދިވެހި ސަރުކާރާއި ހަވާލުކުރައްވާފައެވެ.
