ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމަނިއަމް ޖައިޝަންކަރު ފުރާވަޑައިގެންފިއެވެ.
ރަސްމީ ދަތުރުފުޅެއްގައި ޑރ.ޖައިޝަންކަރު ރާއްޖެ ވަޑައިގަތީ މިދިޔަ ހުކުރު ދުވަހުއެވެ. ދަތުރުފުޅު ނިންމަވާލެއްވުމަށް ފަހު އެ މަނިކުފާން މިއަދު އިންޑިއާއަށް ފުރައިވަޑައިގެންނެވީ އައްޑޫ ގަން އެއާޕޯޓުންނެވެ.
ޖައިޝަންކަރު ރާއްޖެއަށް ކުރެއްވި މި ދަތުރުފުޅުގައި އިންޑިއާގެ އެހީތެރިކަމާއިއެކު ރާއްޖޭގައި ހިންގެވި ބައެއް ޕްރޮޖެކްޓްތައް ނިންމައި ރަސްމީކޮށް ދިވެހި ސަރުކާރާއި ވަނީ ހަވާލުކޮށްފައެވެ. މިގޮތުން 28 ރަށެއްގެ ފެނާއި ނަރުދަމާ ނިންމައި ހަވާލުކުރެއްވިއެވެ. އަދި އައްޑޫގައި ކުރިއަށް ގެންދިޔަ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ މަސައްކަތާއި ގައުކެޑި އާއި މަރަދޫ ގުޅައިލުމަށް އެ ދެމެދުގައި އަޅި ހަންކެޑެ ބްރިޖު ވެސް ވަނީ ނިންމައި ރަސްމީކޮށް ސަރުކާރާއި ހަވާލުކުރައްވާފައެވެ. މި ޕްރޮޖެކްޓްތަކަކީ އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށް ގެންގޮސްފައިވާ ޕްރޮޖެކްޓްތަކެވެ.
މި ދަތުރުފުޅުގައި ޖައިޝަންކަރު ވަނީ ރައީސް ޑރ. މުހައްމަދު މުއިއްޒުއާ، ފޮރިން މިނިސްޓަރު މޫސާ ޒަމީރާ އެކު ރަސްމީ ބައްދަލުވުންތައް ބާއްވާފައެވެ.
