އަބޫ ދާބީ އިން ކަނޑުގައި ކޮށި ޖަހައިގެން މަސް އާލާކުރުމުގެ ބިޔަ މަޝްރޫޢެއް އިފްތިތާހުކޮށްފިއެވެ.
އަބޫ ދާބީގެ އެންވަޔަރަމެންޓު އެޖެންސީގެ ފަރާތުން ކުރިއަށްގެންދާ މި މަޝްރޫޢަކީ ކާނާގެ ޔަޤީންކަން ކަށަވަރުކުރުމަށްޓަކައި އަދި ތިމާވެއްޓަށް ގެއްލުން ކުޑަގޮތަކަށް މަސް އާލާ ކުރުމުގެ މަސައްކަތް ކުރިއަށް ގެންދިޔުމަށް ފަށާ މަޝްރޫޢެކެވެ.
މި މަޝްރޫޢުގައި ކަނޑުގައި 6 ކޮށި ޖަހާނެއެވެ. މި މޝްރޫޢިން އަހަރަކު 100 ޓަނުގެ މަސް ބާޒާރަށް ނެރެވޭނެކަމަށް ވަނީ ލަފާކޮށްފައެވެ.
އާލާ ކުރުމަށް ހަމަޖެހިފައިވާ މަހުގެ ބާވަތްތަކުގެތެރޭގައި ހިމެނެނީ އާބޫ ދާބީގައި އެންމެ ޑިމާންޑު ބޮޑު ބާވަތްތައްކަމުގައިވާ ސަފި އަރަބީ، ގަބިޓު، ޝާމު އަދި ޝެރީއެވެ.
މި މަޝްރޫޢުގެ ދަށުން މަސްވެރިކަމާއި ގުޅުންހުރި މުހިއްމު ދިރާސާތައްވެސް މިތަނުގައި ކުރިއަށް ގެންދިޔުމަށްވަނީ ރާވާފައެވެ.
މި މަޝްރޫއުގައި އެންމެ ފާހަގަކޮށްލެވޭ ކަމަކީ ޒަމާނީ ޓެކްނޮލޮޖީގެ ވަސީލަތައް ބޭނުންކޮށްފައިވުމެވެ. އެގޮތުން އޭއައި އާއި ޑޭޓާ އެއްކުރުމަށް އެންމެ ފަހުގެ މޮނިޓަރިންގ ޑިވައިސްތައް ހަރުކޮށްފައި ހުރުން ހިމެނެއެވެ.
މިއީ މުޅި މެދު އިރުމަތީގައިވެސް މިފަދަ ޒަމާނީ ވަސީލަތްތަކާއި އެކު ގާއިމްކުރާ ފުރަތަމަ މަސް އާލާ ކުރާ ތަންކަން ފާހަގަކޮށްލެވެއެވެ.
