މަސްވެރިކަމުގައި ފާހަގަކޮށްލެވޭ ރަށެއް ކަމަށްވާ ހުވަދުއަތޮޅު ދެކުނުބުރީ ހޯނޑެއްދޫގައި ޒަމާނީ އައު މަސްދޯންޏެއް ނިންމައި މަސްވެރިކަމުގައި ބޭނުން ކުރަން ފަށައިފިއެވެ.
"ރަސްދުވެލި" ނަމުން ނަން ދީފައިވާ މި ދޯންޏަކީ ދިގުމިނުގައި 94 ފޫޓު ހުންނަ ދޯންޏެކެވެ. މި ދޯނީގެ މަސްވެރިކަމުގެ ފުރަތަމަ ދަތުރުގައި މިހާރު ވަނީ ފުރާފައެވެ.
ބަލައިލަން ވެސް ހިތްގައިމު މި ދޯނީގައި ޔަންމާ 659 ހޯސްޕަވަރު އިންޖީނެއް ވަނީ އަޅާފައެވެ. ދޯނީގެ ވެރިފަރާތުން މައުލޫމާތު ދީފައިވާ ގޮތުގައި މި ދޯނި ގަޑިއަކު 13 ނުވަތަ 14 މޭލު ބާރުމިނުގައި ދުވާނެއެވެ.
މި ނޫހަށް މައުލޫމާތު ހިއްސާކުރަމުން ދޯނީގެ ވެރިފަރާތުން ބުނީ މި ދޯންޏަކީ ހޯނޑެއްދޫގައި ބަނދެފައިވާ ދޯންޏެއް ކަމަށާއި، ދޯނި މޫދަށް ބޭލިތާ މިހާރު އަށް ވަރަކަށް މަސް ވެދާނެ ކަމަށެވެ.
މޫދުގައި ބާއްވައިގެން ފިނިޝިންގެ އެންމެ ފަހުގެ މަސައްކަތްތައް ކުރުމަށް ފަހު މިހާރު ދޯނި މަހަށް ނުކުންނަން ފަށާފައިވާކަން ފާހަގަ ކުރަމުން ވެރިފަރާތުން ބުނީ މި ދޯނީގައި މަސްވެރިކަމުގެ ޒަމާނީ ވަސީލަތްތަކުގެ ފަސޭހަކަން ލިބެން ހުންނާނެ ކަމަށެވެ.
