އިމާމުންގެ މަހާސިންތާ އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކަމުގައި އިސްލާމިކް މިނިސްޓަރ ޑރ.މުހައްމަދު ޝަހީމް ޢަލީ ސައީދު ވިދާޅުވެއްޖެއެވެ.
ވަޒީރު މިހެން ވިދާޅުވެފައި ވަނީ އިސްލާމީ ކަންތައްތަކާބެހޭ ވުޒާރާގެ މަސައްކަތްތަކާ ގުޅޭގޮތުން މައުލޫމާތު ދިނުމަށް ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.
އިމާމުން ބިނާކުރުމަށާއި ތަމްރީން ކުރުމަށް މި ސަރުކާރުން ހާއްސަ އިސްކަމެއްދެއްވާއިރު، އަންނަ ހޮނިހިރު ދުވަހު ބާއްވާ އިމާމުންގެ މަހާސިންތާއަކީ ރާއްޖޭގައި ފުރަތަމަ ބާއްވާ މިފަދަ މަހާސިންތާ ކަމުގައި މިނިސްޓަރ ޝަހީމް ވިދާޅުވިއެވެ.
މި މަހާސިންތާގައި މުޖުތަމައުގައި އިމާމުން ދައުރާއި، އިސްލާމީ އުންމަތް ބިނާކުރުމުގައި މިސްކިތުގެ ދައުރުގެ އިތުރުން ފިކުރީ ގޮތުން އިސްލާމީ މުޖުތަމައަށް ކުރިމަތިވާ ގޮންޖެހުންތަކާއި ގުޅޭގޮތުން އިމާމުން ހޭލުންތެރި ކުރުވުމަށް ވަނީ ނިންމާފައެވެ.
ހޮނިހިރު ދުވަހު ބާއްވާ މަހާސިންތާގައި ޖުމްލަ 388 އިމާމަކު ބައިވެރިވާނެ ކަމަށް މިނިސްޓަރ ވިދާޅުވިއެވެ. އެއީ އޮންލައިން ކޮންނާއި ހާޒިރުވެގެންނެވެ.
އިމާމުން ބިނާކޮށް އެމީހުން ތަމްރީންކުރުމަށް އިސްލާމީ ކަންތައްތަކާބެހޭ ވުޒާރާއިން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ރާއްޖެއިން ބޭރަށް ފޮނުވައިގެން މިހާތަނަށް 60 އިމާމުން ތަމްރީން ކޮށްފައިވެއެވެ. އަދި ސަރުކާރުގެ އަމާޒަކީ މިއަހަރުގެ ތެރޭގައި 100 އިމާމުން ބޭރަށް ފޮނުވައިގެން ތަމްރީން ކުރުމެވެ.
