ގަވާއިދާ ހިލާފަށް ހޮންގްކޮންގަށް މިޔަރު އުރަހަ އެތެރެ ކުރި މީހެއް 12 މަސް ދުވަހަށް ޖަލަށް ލާން ހުކުމްކޮށްފިއެވެ.
ބްރެޒިލްގެ އަންހެން ފަތުރުވެރިއެއް ހޮންގްކޮންގަށް އެތެރެކުރުމަށް މަސައްކަތްކޮށްފައިވަނީ ހިމާޔަތްކޮށްފައިވާ ބާވަތެއްގެ މިޔަރު އުރަހައެވެ. އެގޮތުން އޭނާގެ ލަގޭޖުން 450 ކިލޯގެ މިޔަރު އުރަހަވަނީ ފެނިފައެވެ. އޭނާ ހޮންގްކޮންގަށް ގޮސްފައިވަނީ އިތޯޕިއާ މަގުންނެވެ.
އޭނާގެ އަތުން އަތުލައިގަތް މިޔަރު އުރަހައިގެ އަގު 440000 ހޮންގްކޮންގް ޑޮލަރަށް އަރައެވެ.
ހޮންގްކޮންގަށް މިޔަރު އުރަހަ އެތެރެކުރުމުގެ ހުއްދަ ދެނީ އެކަމަށް ހާއްސަ ލައިސެންސް ލިބިފައިވާ މީހުނަށެވެ. އަދި އެޤައުމަށް ގަވާއިދާ ހިލާފަށް މިޔަރު އުރަހަ އެތެރެކުރަން މަސައްކަތްކުރުމަކީ ބޮޑު ކުށެކެވެ. އެގޮތުން 10 މިލިއަން ހޮންގްކޮންގް ޑޮލަރާއި ހަމައަށް ޖޫރިމަނާ ކުރުމާއި އެކު 10 އަހަރުދުވަހާއި ހަމައަށް ޖަލު ހުކުމެއް ތަންފީޒްކުރަން ޖެހިދާނެއެވެ.
ބްރެޒިލްގެ އަންހެންމީހާއަށް ކޯޓުން ފުރަތަމަ ދޭން ނިންމީ 18 މަސްދުވަހުގެ ޖަލު ހުކުމެކެވެ. އެހެންނަމަވެސް އޭނާ ތަހުޤީގަށް ދީފައިވާ އެއްބާރުލުމަށް ބަލައި އަަދަބުވަނީ 12 މަސްދުވަހަށް ލުއިކޮށްދީފައެވެ.
