ބ. ކަމަދޫގައި މޫދު ކުޅިވަރަށް ހާއްސަކޮށްގެން ވޯޓާ ޕާކެއް ހެދުމަށް އެ ރަށު ކައުންސިލުން ނިންމައިފި އެވެ.
ކައުންސިލުން މިހާރު ވަނީ ވޯޓާ ޕާކުގެ އެންވަޔަރަމެންޓަލް އިމްޕެކްޓް އެސެސްމަންޓު (އީއައިއޭ) ހަދައިދޭނެ ބަޔަކު ހޯދަން އިއުލާންކޮށްފަ އެވެ.
ކަމަދޫ ކައުންސިލުން ބުނީ، އެ ޕާކު ހަދަން ނިންމީ އެ ރަށުގެ ރައްޔިތުންނަށް މޫދެއް ބޭނުންވާތީ ކަމަށެވެ.
ކައުންސިލުން ބުނި ގޮތުގައި ވޯޓާ ޕާކު ހަދާނީ ޕިކްނިކް ދިއުމާއި މޫދު ކުޅިވަރަށް ހާއްސަ ބީޗަކާއެކު ކަމަށާއި ޕާކު ހަދަނީ ސްލައިޑުތައް ވެސް ހިމަނައިގެންނެވެ. އެ ރަށުގައި ވޯޓާ ޕާކެއް ހަދަނީ ކައުންސިލްގެ ބަޖެޓުންނާއި ދީލަތި ފަރާތްތަކުގެ އެހީގައެވެ.
ގާތްގަނޑަކަށް 500 މީހުން ދިރިއުޅޭ ކަމަދު އަކީ އީދުގައި ގިނަ ބަޔަކު ދާ އެއް ރަށެކެވެ.
