މާލޭ އުސްފަސްގަނޑާއި ދިމާ މޫދުން މިއަދު ހަވީރު މަރުވެފައި އޮއްވާ ފެނިފައި ވަނީ ހ. ވެލަސްފަރުގެ، އިބްރާހީމް ޖައުހަރީ (62އ) ކަމަށް ފުލުހުން ބުނެފިއެވެ.
ފުލުހުން މީޑިއާތަކާއި ހިއްސާކުރި މެސެޖެއްގައި ބުނީ ކަނޑުމަތީގައި މީހަކު މަރުވެފައި އޮތްކަމުގެ ރިޕޯޓު އެ އިދާރާއަށް ލިބިފައި ވަނީ މިއަދު ހަވީރު 17:06 ހާއިރު ކަމަށެވެ.
އެ ރިޕޯޓު ލިބުމާއެކު ފުލުހުން އެ ސަރަހައްދުގައި ހަރަކާތްތެރިވެ، އެ މީހާ އައިޖީއެމްއެޗަށް ގެންގޮސްފައިވާ ކަމަށް ފުލުހުން ބުންޏެވެ. އެ މީހާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް އައިޖީއެމްއެޗާ ހަވާލާދީ ފުލުހުން ބުންޏެވެ.
ޖައުހަރީގެ އާންމު ނަމަކީ ޖައުފަރެވެ. އޭނާއަކީ ރާއްޖޭގައި ހިންގި އިސްލާހީ ހަރަކާތުގައި ވަރަށް އިސް ސަފުގައި މަސައްކަތް ކުރެއްވި އެކަކެވެ.
ފުލުހުން އަންނަނީ އެ މައްސަލަ އިތުރަށް ތަހުގީގު ކުރަމުންނެވެ.
