ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އިން ކޮންމެ ދެ އަހަރުން އެއް އަހަރު ބާއްވަމުން އަންނަ ބައިނަލްއަގުވާމީ މުދައްރިސުންގެ މަހާސިންތާގެ، ހަތްވަނަ މަހާސިންތާ މިއަދު ފަށައިފިއެވެ.
"އެޑިއުކޭޓް އެމްޕަވާ އެލިވޭޓް އިކުއިޓެބަލް އެޑިއުކޭޝަން ފޯ ޓުވެންޓީ ފަސްޓް ސެންޗުއަރީ އެކްސެލެންސް" ތީމްގެ ދަށުން މި އަހަރު ކުރިއަށް ގެންދާ މަހާސިންތާ ދެ ދުވަހުގެ ނިޔަލަށް ކުރިއަށްދާނެއެވެ.
މަހާސިންތާ ފެށުމުގެ ގޮތުން މިއަދު ސީއެޗްއެސްސީގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދުއެވެ. މި ރަސްމިއްޔާތުގައި ތައުލީމީ ކަންތައްތަކާ ބެހޭ ވަޒިރު ޑރ. އިސްމާޢިލް ޝަފީއު ވެސް ބައިވެރިވެވަޑައިގެންނެވިއެވެ.
މި މަހާސިންތާގައި ބައިވެރިވުމަށް 250 މުދައްރިސުން ރަޖިސްޓަރީ ކޮށްފައިވާއިރު، މި މަހާސިންތާގައި 60 ރިސާޗް ކަރުދާހާއި ހަތަރު ކޭސް ސްޓަޑީ ހުށަހަޅާފައިވާއިރު، ދެ ކީނޯޓް އަދި ދެ ޕެނަލް ޑިސްކަޝަން ބާއްވަން ވަނީ ހަމަޖެހިފައެވެ.
ކިޔަވައި ދިނުމުގައި ދިމާވާ މައްސަލަތައް ދެނެގަނެ އެ ކަންކަމާ މެދު ފުޅާދާއިރާއެއްގައި މަޝްވަރާ ކުރުމުގެ އިތުރުން ކިޔަވައިދިނުމުގެ ފެންވަރު މަތިކުރުމަށްޓަކައި މި މަހާސިންތާ ފުރަތަމަ ބާއްވާފައި ވަނީ 2012 ވަނަ އަހަރުއެވެ. އެންމެ ފަހުން މި މަހާސިންތާ ބާއްވާފައި ވަނީ 2022 ވަނަ އަހަރު ހދ.ކުޅުދުއްފުށި ސިޓީގައެވެ.
މި މަހާސިންތާ ބޭއްވުމުގެ މަގުސަދުތަކުގެ ތެރޭގައި ހިމެނެނީ ތައުލީމީ ދާއިރާގައި މަސައްކަތްކުރާ މީހުންނަށް ދިމާވާ ގޮންޖެހުންތަކާއި އެ ގޮންޖެހުންތައް ހައްލުކުރެވިދާނެ ގޮތްތައް ދެނެގަތުމާއި، ކިޔަވައިދިނުން އިތުރަށް ހަރުދަނާ ކުރުމަށްޓަކައި ހިޔާލު ބަދަލުކޮށް މަޝްވަރާ ކުރުމުގެ އިތުރުން ބޭރު ގައުމުތަކުގެ ތައުލީމީ ދާއިރާގައި މަސައްކަތްކުރާ މީހުންނަށް ރާއްޖެ ތައާރަފު ކޮށްދިނުމާ އެކު، ރާއްޖޭގައި "އެކަޑެމިކް ޓުއަރިޒަމް" ކުރިއެރުވުމެވެ.
