ނުރައްކާތެރި ކެމިކަލާބެހޭ ގަވާއިދުގައި ބަޔާންކޮށްފައިވާ މިންގަނޑަށް ކެމިކަލް ރައްކާކުރާ ތަންތަނާއި ވިޔަފާރިކުރާތަންތަން ހުރިތޯ ބެލުމާއި މި ގަވާއިދަށް އާއްމު ރައްޔިތުން ހޭލުންތެރިކުރުވުމަށް ހިންގާ "އޮޕަރޭޝަން ހިރާސް ފާސް" މިއަދު ފަށައިފިއެވެ.
މި މަސައްކަތް މިއަދު ފެށުމުގެ ގޮތުން، މިކަމުގައި ހަރަކާތްތެރިވާ ޓީމްތަކާ، ޑެޕިއުޓީ މިނިސްޓަރ އޮފް ޑިފެންސް، ފާޠިމަތު މިޒްނާ ޢަލީ ބައްދަލުކުރައްވާ، "އޮޕަރޭޝަން ހިރާސް ފާސް" ހިންގުމުގެ މުހިންމު ކަމާ ގުޅޭ ގޮތުން ވާހަކަފުޅު ދެއްކެވިއެވެ.
އޮކްޓޯބަރ މަހުގެ 1 ން 15 އަށް ކުރިއަށްގެންދިއުމަށް ހަމަޖެހިފައިވާ މި އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް މި އޮޕަރޭޝަންގެ ތެރެއިން ދެނެގަންނާނެއެވެ.
