ސަރުކާރުން ފަރުމަސްވެރިކަން ކުރިއެރުވުމަށް، ފަރުމަސްވެރިކަން ކުރާ ފަރާތްތަކަށް ދޫކުރާ ލޯން ސްކީމްގެ ދަށުން މިހާތަނަށް 37 ފަރާތަކަށް ލޯން ދޫކޮށްފައިވާ ކަމުގައި މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.
ވަޒީރު މިހެން ވިދާޅުވެފައި ވަނީ އެ ވުޒާރާގެ މަސައްކަތްތަކާއި ގުޅޭގޮތުން މީޑިއާއަށް މައުލޫމާތު ހިއްސާ ކުރުމަށް އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
ފަރުމަސްވެރިކަން ކުރާ ފަރާތްތަކަށް މި ލޯނުގެ ދަށުން ހަތްލައްކަ ރުފިޔާއާއި ހަމައަށް ލޯނު ދޫކުރާއިރު، މިއީ އެއްވެސް ރަހުނެއް ބަހައްޓަން ނުޖެހޭ ލޯނެކެވެ. މި ލޯނު ދައްކަން 10 އަހަރުގެ މުއްދަތެއް ލިބެއެވެ. މި ފުރުސަތުގެ ދަށުން ޖުމްލަ 30 މިލިއަން ރުފިޔާގެ ލޯނު ދޫކުރުމަށް ވަނީ ހަމަޖެހިފައެވެ.
މި ލޯނަށް ކުރިމަތިލާން ހުޅުވާލި ފުރުސަތުގެ ދަށުން 121 ފަރާތަކުން ލޯނަށް އެޕްލައިކުރި ނަމަވެސް އޭގެތެރެއިން ޝަރުތުހަމަވެފައި ވަނީ 62 ފަރާތަކުންނެވެ. ޝަރުތުހަމަވާ ފަރާތްތަކުގެ ތެރެއިން މިހާތަނަށް ލޯނު ދޫކޮށްފައި ވަނީ 37 ފަރާތަށެވެ.
އެ ބައްދަލުވުމުގައި ވާހަކަފުޅުދައްކަވަމުން މިނިސްޓަރ ވިދާޅުވީ ފަތުރުވެރިކަން ތަރައްޤީވަމުން އަންނައިރު ފަރުމަހަށް އޮންނަ ޑިމާންޑް އިތުރުވަމުންދާކަމަށާއި މިއީވެސް ކުރިއަރަމުން އަންނަ ސިނާއަތެއްކަމަށެވެ.
މިނިސްޓަރ އިތުރަށް ވިދާޅުވީ ފަރުމަސްވެރިންގެ ޝަކުވާތައް އަޑުއަހާލުމުން އިނގިގެންދިޔައީ މީގެކުރިން ފަރުމަސްވެރިންގެ ކަންބޮޑުވުންތަކަށް ސަރުކާރުތަކުން އެއްވެސް އިޖާބައެއް ދީފައެއް ނުވާކަމަށެވެ.
