ދިވެހިރާއްޖޭގެ 44 ވަނަ މަސްވެރިންގެ ދުވަހުގެ މުނާސަބަތުގައި ބާއްވާ އާޓް އެގްޒިބިޝަން އަށް އާޓްވޯކް ހުށަހެޅުމުގެ ފުރުސަތު މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ހުޅުވާލައިފިއެވެ.
މި އެގްޒިބިޝަން ބޭއްވުމަށް ހަމަޖެހިފައި ވަނީ އަންނަ ޑިސެމްބަރ މަހުގެ 12 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ. މި އެގްޒިބިޝަންއަކީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އާއި މޯލްޑިވިއަން އާޓް ކޮމިއުނިޓީ ގުޅިގެން މާލޭގައި ބާއްވާ އިވެންޓެކެވެ. މި އެގްޒިބިޝަންއަށް އާޓްވޯކް ހުށަހެޅުމުގެ ފުރުސަތު ވަނީ 16 އަހަރުން މަތީގެ ހުރިހާ ފަރާތްތަކަށް ހުޅުވާލާފައެވެ. މި އެގްޒިބިޝަންގައި އާޓްވޯކް ވިއްކަން ބޭނުންވާ ފަރާތްތަކަށް އެ ފުރުސަތު ވެސް ވަނީ ހުޅުވާލާފައެވެ.
މި އެގްޒިބިޝަން އަށް ފަސް ވައްތަރެއްގެ އާޓްވޯކް ހުށަހެޅޭނެއެވެ. އޭގެތެރޭގައި ހިމެނެނީ ކުރެހުމާއި، ޕެއިންޓް ކުރުމާއި، ޑިޖިޓަލް އާޓްވޯކާއި، ސްކަލްޕްޗަރގެ އިތުރުން މިކްސް މީޑިއާއެވެ.
މި އަހަރު މަސްވެރިންގެ ދުވަހުގެ ތީމެއްގެ ގޮތުގައި ކަނޑައަޅާފައި ވަނީ "މަސްވެރިކަމުގެ ސިނާއަތް ސިންދަފާތު ކުރުމަށް ޒުވާނުން ބައިވެރިވުން" އެވެ.
މި އެގްޒިބިޝަން ބޭއްވުމުގެ މަގުސަދުތަކުގެ ތެރޭގައި ހިމެނެނީ މަސްވެރިކަމުގެ ސިނާއަތަށް ކުރިމަތިވެފައިވާ ގޮންޖެހުންތަކާއި ފުރުސަތުތަކާ މެދު ހޭލުންތެރިކަން އިތުރުކުރުމުގެ އިތުރުން ފަންނާނުންނަށް އުފެއްދުންތެރިކަން ފާޅުކުރެވޭނެ ޕްލެޓްފޯމެއް ހުށަހަޅައިދިނުމެވެ.
މި އެގްޒިބިޝަންގައި ބައިވެރިވާން ބޭނުންވާ ފަރާތްތަކުން އެކަމަށް ހާއްސަ ކުރެވިފައިވާ އޮންލައިން ފޯމް ފުރިހަމަ ކުރުމަށް ފަހު މި މަހުގެ 21 ވަނަ ދުވަހުގެ 14:00 ގެ ކުރިން ސަބްމިޓް ކުރުމަށް އިންތިޒާމް ކުރާ ފަރާތުން އެދެއެވެ.
