ދިވެހިރާއްޖޭގެ މަސްވެރިކަމުގެ ސިނާއަތަށް ދިމާވެފައިވާ މައްސަލަތަކަށް ދާއިމީ ހައްލެއް ލިބިފައިނުވަނީ، ފާއިތުވެދިޔަ ތަނުގައި މައްސަލަ ހައްލުކުރުމުގެ ނަމުގައި ވަގުތީ ހައްލު ގެނެސްފައިވާތީ ކަމުގައި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.
ވަޒީރު ޝިޔާމު މިހެން ވިދާޅުވީ ކޮންމެ އަތޮޅެއްގައި، އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސެވުމަށް، "ފިއުލު ސްޓޯރޭޖް"ތައް ގާއިމްކުރުމުގެ މަޝްރޫޢު އިފްތިތާޙްކުރުމަށް ރައީސް އޮފީހުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ވަޒީރު ޝިޔާމު ވިދާޅުވީ މަސްވެރިންނަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމުގެ މަސައްކަތްތައް، ރައިސް ޑރ.މުޢިއްޒު ވެރިކަމަށް އިންތިހާބުވެވަޑައިގަތުމާއިއެކު ފަށްޓަވާފައިވާކަމަށެވެ.
ވަޒީރު ޝިޔާމު ވިދާޅުވީ މަސްވެރިންނަށް ހުރި ދަތިތަކަށް ހައްލު ހޯއްދަވައިދެއްވުމަށް ރައީސުލްޖުމްހުރިއްޔާ އިސްނަންގަވައިގެން މަސައްކަތްކުރައްވާ ކަމަށެވެ. އެގޮތުން މި ދާއިރާގެ ހުރިހާ ކަމެއްގައިވެސް ވަރަށް ގާތުން ކަންކަން ބައްލަވައި މަސައްކަތް ކުރައްވަމުންގެންދަވާކަމަށް ވަޒީރު ޝިޔާމު ވިދާޅުވިއެވެ.
