ފާއިތުވި އޮކްޓޯބަރ މަހުގެ 28 ވަނަ ދުވަހުން ފެށިގެން މި މަހުގެ 15 ވަނަ ދުވަހާއި ހަމައަށް ކިރުވާފައިވާ މަހަށް ދޫނުކޮށް އޮތް 22.9 މިލިއަން ރުފިޔާ ދޫކުރަން ފަށާފައިވާކަމުގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ބުނެފިއެވެ.
މިފްކޯއިން ބުނީ ކޫއްޑޫ އާއި އައްޑޫ ފިޝަރީސް ކޮމްޕްލެކްސްއަށް ބުނެވިދިޔަ މުއްދަތުގައި ކިރުވި މަހަށްވާ ފައިސާ މިހާރު ދޫކޮށް ނިމިފައިވާ ކަމަށާއި، މިހާރު ދޫކުރަމުން އަންނަނީ އެ މުއްދަތުގައި ފެލިވަރު ފިޝަރީސްއަށް ކިރުވާފައިވާ މަހަށްވާ ފައިސާ ކަމަށެވެ.
މަސްވެރިންނަށް އެންމެ ފަހުން ފައިސާ ދޫކޮށްފައި ވަނީ މިދިޔަ މަހުގެ 31 ވަނަ ދުވަހުއެވެ. އެ ދުވަހު ދޫކޮށްފައި ވަނީ ސެޕްޓެމްބަރ 27 ވަނަ ދުވަހުން ފެށިގެން އޮކްޓޯބަރ 27 ވަނަ ދުވަހާއި ހަމައަށް ކިރުވާފައިވާ މަހަށްވާ 15 މިލިއަން ރުފިޔާއެވެ.
މި ސަރުކާރު ވެރިކަމާއި ހަވާލުވެ ފާއިތުވި އަހަރެއްހާ މުއްދަތުގެ ތެރޭ މަސްވެރިނަށް ވަނީ ބިލިއަނަކަށްވުރެ ގިނަ ފައިސާ ދޫކޮށްފައެވެ.
