ކުރިއަށް އޮތް ދެދުވަހު ރާއްޖޭގެ މޫސުން ގޯސްވެ ވައިގަދަވެ ކަނޑުތައްވެސް ގަދަވާނެކަމަށް ލަފާކޮށް ސަމާލުވުމަށް މޫސުމާއި ބެހޭ ގައުމީ އިދާރާއިން އިލްތިމާސްކޮށްފިއެވެ.
މިހާރު ރާއްޖެއަށް ކުރަމުންދާ ވިއްސާރާގައި އެންމެ ބޮޑަށް ގަދަވާނީ ރާއްޖޭގެ ދެކުނުގެ އަތޮޅުތަކަށްވެސް މޫސުމާބެހޭ ޤައުމީ އިދާރާއިން ވަނީ ހާމަކޮށްފައެވެ.
މޫސުމާބެހޭ ގައުމީ އިދާރާއިން ވިދާޅުވީ ކުރިއަށް އޮތް ދެދުވަހުވެސް ދެކުނާއި މެދު ރާއްޖެތެރެއަށް ކަނޑު ގަދަވެ އާންމުކޮށް ވައި ގަދަވާނެ ކަމަށާއި އެވްރެޖުކޮށް މެދު ރާއްޖެތެރެއަށް 13 މޭލާއި 23 މޭލާއި ދެމެދު ވައިޖެހޭނެކަމަށެވެ. އަދި ދެކުނުގެ އަތޮޅުތަކަށް 15 މޭލާއި 25 މޭލާއި ދެމެދު ވައިޖެހޭނެކަމަށް ލަފާކުރެވޭކަމަށް ވިދާޅުވިއެވެ. މިއާއެކު ކަނޑުތައް ގަދަވާނެކަމަށްވެސް އެއިދާރައިން ވަނީ ވިދާޅުވެފައެވެ.
އެއިދާރާއިން އިތުރަށް ވިދާޅުވީ މިހާރު ކުރަމުންދާ ވިއްސާރައަކީ ރާއްޖޭގެ ސަރަހައްދުގައި އުފެދިފައިވާ ބާރުގަދަ ކޮޅިގަނޑު ތޫފާނަކަށް ބަދަލުވުމާއި ގުޅިގެން ކުރަމުންދާ ވިއްސާރަކަމަށާއި، ތޫފާނުގެ މިހާރު ދަތުރުކުރަމުންދަނީ އިންޑިއާގެ ޓަމިލްނާޑޫގެ އައްސާރިފަށާއި ދިމާލަށްކަމަށާއި، މިހާރު ކުރަމުންދާ ވިއްސާރައަކީ އެ ތޫފާނުގެ ނުސީދާ އަސަރުގެ ސަބަބުންކުރާ ވިއްސާރަކަމަށްވެސް އެ އިދާރާއިން ވިދާޅުވިއެވެ.
މޫސުމާއި ބެހޭ ގައުމީ އިދާރާއިން މިއަދު ވެސް އަންނަނީ ރާއްޖޭގެ އެކި ހިސާބުތަކަށް މޫސުމީ ސަމާލު ނެރެމުންނެވެ.
