ދިވެހި ގައުމިއްޔަތުގެ އިސްވަރުގެ ފުރަތަމަ މަހާސިންތާ "ކަޅުއޮށްފުންމި - ދިވެހި ޤައުމިއްޔަތުގެ ދަރުބާރު" ކާމިޔާބު ކަމާއިއެކު ނިންމާލައިފިއެވެ.
މި މަހާސިންތާއަކީ ދިވެހި ޤައުމިއްޔަތުގެ އިސްވަރުގެ މަސްއޫލިއްޔަތުތަކާއި ޒިންމާތަކުގެ ތެރޭގައި ހިމެނޭ ދިވެހި ޤައުމިއްޔަތުގެ ޢިލްމު ފެތުރުމުގެ ޒިންމާގެ ދަށުން ބޭއްވި ފުރަތަމަ ޢިލްމީ މަހާސިންތާއެވެ.
މި މަހާސިންތާ އަހަރަކު ދެފަހަރު ބޭއްވުމަށް ނިންމާފައިވާއިރު، މަހާސިންތާ ބާއްވަން ތާވަލުކޮށްފައި ވަނީ އިރުވާ މޫސުމުގައި އެއް މަހާސިންތާ އަދި ހުޅަނގު މޫސުމުގައި އެއް މަހާސިންތާއެވެ.
މިއަދުގެ ނިޔަލަށް ކުރިއަށް ގެންދިޔަ މި މަހާސިންތާ ބާއްވާފައި ވަނީ އިސްލާމީ ޔުނިވާ ސިޓީގައެވެ. މި މަހާސިންތާ ޝަރަފްވެރިކޮށްދެއްވާފައި ވަނީ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ.
މި މަހާސިންތާ ޝަރަފްވެރިކޮށްދެއްވައި ވާހަކަފުޅު ދައްކަވަމުން ނައިބް ރައީސް ވިދާޅުވީ ދިވެހި ގައުމިއްޔަތާއި ދިވެހި ބަހަށް އިސްކަންދިނުމަށް ހާއްސަކޮށްގެން, ރާއްޖޭގެ ތާރީހުގައި މިހާތަނަށް އުފެއްދި ފުރަތަމަ ވުޒާރާއިން އިންތިޒާމުކޮށް, އެފަދަ ދަރުބާރެއް އިފްތިތާހުކުރުމަކީ ލިބުނު ވަރަށް ބޮޑު އުފަލެއް ކަމަށެވެ. އަދި ދިވެހި ގައުމިއްޔަތާމެދު މަޝްވަރާކޮށް, މައުލޫމާތު ބަދަލުކުރުމަށް އެފަދަ މަހާސިންތާއެއް ފަހުގެ ތާރީހުގައި ބޭއްވިފައި ނުވާކަން ނައިބު ރައީސް ފާހަގަކުރެއްވިއެވެ.
މި މަހާސިންތާގައި ނުވަ ކަރުދާހެއް ވަނީ ހުށަހަޅާފައެވެ. އޭގެތެރޭގައި ހިމެނެނީ ރާއްޖެއަށް އިސްލާމްދީން ތައާރަފުވެ، ތަރައްގީ ވެގެން އައި ގޮތާއިބެހޭ ދިރާސާތަކާއި ދިވެހިބަހާއި ސަގާފަތުގެ އިތުރުން އިހުގެ އިސްލާމީ ފަރުމާތަކާބެހޭ ދިރާސީ ހުށައެޅުންތަކުގެ އިތުރުން ދިވެހިރާއްޖެ އުފެދިފައިވާގޮތުގެ އިލްމީ ކަރުދާސްތައްވެސް މަހާސިންތާގެ ބައިވެރިންނާ ވަނީ ހިއްސާކޮށްފައިވެއެވެ.
ދިވެހިބަހާއި ސަގާފަތާއި ތަރިކައާބެހޭ ވުޒާރާއިން މަހާސިންތާ އިންތިޒާމް ކުރުމުގެ ބޭނުމަކީ ދިވެހިވަންތަކަމުގެ ދާއިރާގައި ހަރަކާތްތެރިވާ ބައިވެރީންގެ މެދުގައި ވިސްނުމާއި އިލްމު ހިއްސާކުރުމުގެ ޕްލެޓްފޯމެއް ގާއިމްކޮށްދިނުމެވެ.
