މަސް އައިންތައް ހޯދުމަށް ބޭނުންކުރެވޭނެ ޑްރޯނެއް ސައުތު ކޮރެއާގެ ކުންފުންޏަކުން އުފައްދައިފިއެވެ.
ސައުތު ކޮރެއާގެ ޑޮންގްވޮން އިންޑަސްޓްރީސްއިން އުފައްދާފައިވާ މި ޑްރޯނަކީ މަސް އައިންތައް ހޯދުމަށް ހާއްސަކޮށްފައިވާ މޮޑަލެކެވެ. މި ޑްރޯން އުފެއްދުމަށް 2 އަހަރު ވަނީ ހޭދަކޮށްފައެވެ. މި ޑްރޯނަކީ އަމިއްލައަށް އުދުއްސައިގަތުމާއި އަދި އަމިއްލައަށް އަނބުރާ މަސް ބޯޓަށް އައުމުގެ ޤާބިލްކަން ލިބިފައިވާ އެއްޗެކެެވެ.
އަދި ދުރު ރާސްތާއެއްގައިވެސް މުވާސަލާތު ކުރުމުގެ ޤާބިލްކަމާއި ގަދަ ވައިގައިވެސް ބޭނުން ކުރެވޭނެ ޑްރޯންއެއް ކަމަށް ޑޮންގްވޮން އިން ބުނެއެވެ.
މި ޑްރޯން މަސައްކަތްކުރަނީ ބެޓަރީ ބޭނުންކޮށްގެންނެވެ. އެގޮތުން ދުނިޔޭގެ އެންމެ ބާރުގަދަ ބެޓަރިތައް ވަނީ މި ޑްރޯންގައި ބޭނުންކޮށްފައެވެ. މިއާ އެކު ދުވެލި ބާރުވެފައި މަސް އައިންތައް ހޯދުމަށް ހޭދަކުރަންޖެހޭ ވަގުތުވެސް ކުޑަކުރެވިގެންދާނެ ކަމަށް ޑޮންގްވޮން އިން ވަނީ ބުނެފައެވެ.
