ބިދޭސީއަކު އިސްވެ މާފަންނަނުގައި ގަވާއިދާ ޚިލާފަށް ހިންގި ކެފޭއެއް ބަލައިފާސްކޮށް، ސައްހަ ވިސާއެއް ނެތި އުޅުނު ތިން ބިދޭސީން ރޭ އިމިގްރޭޝަނުން ހިފަހައްޓައިފިއެވެ.
އިމިގްރޭޝަނުން ބުނީ ރޭ ހިންގި އޮޕަރޭޝަނަކީ އެ ކެފޭއަށް އަމާޒުކޮށް ޓާސްކް ފޯސްއިން ކުރިއަށް ގެންދިއަ ރެއިޑް އޮޕަރޭޝަނެއް ކަމަށެވެ. މި އޮޕަރޭޝަންގައި ހިފަހައްޓާފައި ވަނީ، ގަވާއިދާ ޚިލާފަށް ސައްހަ ވިސާއެއް ނެތި އުޅެމުންދިޔަ ދެ ބިދޭސީ ފިރިހެނަކާއި ބިދޭސީ އަންހެނެކެވެ.
ރާއްޖޭގައި ގަވާއިދާ ޚީލާފަށް އުޅޭ ބިދޭސީން ހޯދުމަށް އިމިގްރޭޝަނުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، އެންމެ ގިނައިން ބިދޭސީން އުޅޭ ތަންތަން ބަލައިފާސްކޮށް، ގަވާއިދާށް ނުފެތޭ ބިދޭސީން ޑީޕޯޓުކުރެއެވެ.
މީގެއިތުރުން ބިދޭސީން ގަވާއިދަށް ފެއްތުމަށާއި ރާއްޖޭގައި އުޅޭ ހުރިހާ ބިދޭސީންގެ މައުލޫމާތު ހޯދުމަށް ހޯމް މިނިސްޓްރީން ވެސް ވަނީ އޮޕަރޭޝަނެއް ފަށައިފައެވެ. މި އޮޕަރޭޝަންގައި ގަވާއިދާ އެއްގޮތަށް ރާއްޖޭގައި މަސައްކަތްކުރުމުގެ ފުރުސަތު އެ ބިދޭސީންނަށް ދެއެވެ.
