ދުނިޔޭގެ އެންމެ ބޮޑެތި ޑުރަޖެރުތަކުގެ ތެރޭގައި ހިމެނޭ "ކްރިސްޓަބަލް ކޮލޯން" ޑްރެޖަރު ގެނެސް ރަސްމާލެ ހިއްކުމުގެ މަސައްކަތް ތިންގުނަ އަވަސްކޮށްފައިވާ ކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ބޮޑު ޑްރެޖަރު ގެނެސް ރޭ ފަތިހި މަސައްކަތް ފަށާފައިވާއިރު މިހާރު ވެލި އެޅުމުގެ މަސައްކަތް ދަނީ ކުރިއަށެވެ. ރަސްމާލެ ތަރައްގީކުރަނީ 100 އިންސައްތަ ނެޓް ޒީރޯ ކާބަން، ސްމާޓް އިކޯ ސިޓީއެއްގެ ގޮތުގައެވެ.
ބޮޑު ޑްރެޖަރު ގެނެސް މަސައްކަތް ހަލުވި ކުރިއިރު ރަސްމާލޭގެ ގާތްގަނޑަކަށް 100 ހެކްޓަރުގެ ބިން އޮތީ ހިއްކައިފަ އެވެ. އެއީ މަޝްރޫއުގެ 10 ޕަސެންޓެވެ. ނުވަތަ ހުޅުމާލެ 1 ގެ ދެބައިކުޅަ އެއްބަޔަށް ވުރެ ބޮޑު ސަރަހައްދެކެވެ.
ރަސްމާލެ އިން 25،000 ގޯތި ދޫކުރާނެއެވެ. އޭގެ ތެރެއިން 15،000 ގޯއްޗާއި 7،500 ފްލެޓް ހިމެނެއެވެ. އެ މަޝްރޫއުއަށް ކުރިމަތިލާން ހުޅުވާލާނީ އަންނަ އަހަރުގެ ޖެނުއަރީ 4 ގައެވެ.
މާލޭ ސަރަހައްދުގެ ބޯހިޔާވަހިކަމުގެ މައްސަލައަށް ހައްލެއް ހޯދުމުގެ ގޮތުން، ހުޅުމާލެ 3 ހިއްކުމުގެ މަސައްކަތަށް ވެސް މިދިޔަ ހަފުތާގައި ބޮޑު ޑްރެޖަރެއް ގެނެސް މަސައްކަތް ހަލުވިކޮށްފައިވާ ކަމަށާއި، މި ޑިސެމްބަރު މަހުގެ ނިޔަލަށް އެތަން ހިއްކައި ނިމޭނެ ކަމަށް ރައީސް ވިދާޅުވި އެވެ. ހުޅުމާލެ 3 ހިއްކާ ނިމުމުން، އެ ޑްރެޖަރު ބޭނުންކުރާނީ ގިރާވަރު ފަރު ހިއްކުމުގެ މަސައްކަތަށް ކަމަށާއި، އެ މަސައްކަތް 2-3 މަސް ތެރޭގައި ނިމޭނެ ކަމަށް ވެސް ރައީސް ވިދާޅުވިއެވެ.
