ތޫފަން "ދިތްވާ"ގެ ސަބަބުން ގިނަ ގެއްލުންތަކެއްވެ، ހާލުގައި ޖެހިފައިވާ ލައްކާ ރައްޔިތުންނަށް އެހީތެރިވުމަށްޓަކައި ދިވެހި ސަރުކާރުގެ ފަރާތުން ހަދިޔާކުރި ބައިލައްކަ ޑޮލަރު، މިއަދު އެ ގައުމުގެ ސަރުކާރާ ހަވާލުކޮށްފިއެވެ.
ތޫފާން ދިތްވާގެ ސަބަބުން ލަންކާގެ ގިނަ ހިސާބުތަކެއްގައި ފެންބޮޑުވެ، އެތައް ބައެއްގެ ގެދޮރު ވަނީ ހަލާކުވެފައެވެ. މި ހާދިސާގައި ގިނަ ބަޔަކު މަރުވެފައި ވާއިރު، އެ ގައުމަށް އެހީތެރިވުމަށް ބައިލައްކަ ރުފިޔާއާއި25،000 މަސްދަޅު ކޭސް ހަދިޔާކުރަން ނިންމައި އެކަން ސަރުކާރުން އިއުލާނުކުރީ މިދިޔަ ހޮނިހިރު ދުވަހުއެވެ.
މި ފައިސާ އެގައުމުގެ ސަރުކާރާ ހަވާލުކުރީ މިއަދު މެންދުރު ފަހު ބޭއްވި ރަސްމިއްޔާތެއްގައެވެ. ރާއްޖޭގެ ފަރާތުން ފައިސާ ހަވާލުކުރެއްވީ ރާއްޖެއިން ލަންކާއަށް ކަނޑައަޅުއްވާފައި ހުންނަވާ ސަފީރު މަސްއޫދު އިމާދެވެ. މި ފައިސާއާ ލަންކާ ސަރުކާރުގެ ފަރާތުން ހަވާލުވެވަޑައިގަތީ އެ ގައުމުގެ ފޮރިން މިނިސްޓަރު ވިޖިތާ ހެރަތުއެވެ.
ލަންކާ ރައްޔިތުންނަށް އެހީވުމަށް ރާއްޖޭގައި ގިނަ ހަރަކާތްތަކެއް ކުރިއަށް ގެންދާއިރު، މީޑިއާތައް ގުޅިގެން ވަނީ ޓެލެތޯނެއް ވެސް ކުރިއަށް ގެންގޮސްފައެވެ. މި ޓެލެތޯނުން 800،352 ޑޮލަރު ލިބިފައި ވެއެވެ. މި ފައިސާ ދައުލަތުގެ މީޑިއާ ޕީއެސްއެމްގެ ފަރާތުން މިއަދު ވަނީ ފޮރިން ިމިނިސްޓްރީއާ ހަވާލުކޮށްފައެވެ.
