ބޮޑުތަކުރުފާނު މަގުގެ ފުރަތަމަ ފިޔަވަހީގެ ފުރަތަމަ ސެގްމަންޓްގެ މަސައްކަތް ނިންމާ، އާއްމުންނަށް ހުޅުވާލައިފިއެވެ.
މި ސެގްމަންޓުގައި ތާރު އެޅުން ފެށީ މިމަހުގެ 4 ވަނަ ދުވަހުއެވެ. ޝަހީދު ޙުސައިން އާދަމް ބިލްޑިންގާ ހަމައަށް ހިމެނޭ 130 މީޓަރުގެ މި ސަރަހައްދު ތަރައްގީކުރީ، މަގު 6 މީޓަރު ފުޅާކޮށް، ޒަމާނީ ފެން ހިންދާ ނިޒާމަކާއެކުއެވެ.
މަގުގެ މަސައްކަތް އެމްޓީސީސީއާ ހަވާލުކޮށްފައިވަނީ ދެ ފިޔަވައްސަކަށެވެ. ދެން މަސައްކަތް ފަށާނީ ލޯކަލް މާރުކޭޓުން ފެށިގެން ނޯތު ހާބަރާ ހަމައަށް ހިމެނޭ 250 މީޓަރުގެ ސަރަހައްދެއްގައެވެ. ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1088 މީޓަރުގެ ސަރަހައްދެއް ތަރައްގީކުރާއިރު، ފޭސް 1 ގައި ހިމެނޭ ލޯކަލް މާރުކޭޓުން ފެށިގެން ހެންވޭރު ފެރީ ޓާމިނަލްއާ ހަމައަށްވާ 5 ސެގްމަންޓްގެ 838 މީޓަރުގެ މަސައްކަތް ކުރިއަށް ގެންދަނީ 144 މިލިޔަން ރުފިޔާއަށެވެ.
މީގެ އިތުރުން، ޗައިނާ ސަރުކާރުގެ އެހީގައި މާލޭގައި އިތުރު ބޮޑު މަގު ހެދުމުގެ މަޝްރޫއެއް ފެށުމަށްވެސް ސަރުކާރުން ވަނީ ނިންމާފައެވެ.
