ނޮވެމްބަރު މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް 2.20 ބިލިއަން ރުފިޔާގެ ޢާމްދަނީއެއް ލިބިފައިވާކަމަށް އެ އޮތޯރިޓީން ބުނެފިއެވެ.
މި އަދަދަކީ މިދިޔަ އަހަރުގެ ނޮވެމްބަރު މަހާއި އަޅާބަލާއިރު 16.6 އިންސައްތަ އިތުރު އަދަދެކެވެ. މީރާއަށް ލިބުނު އާމްދަނީ އިތުރުވުމުގެ މައިގަނޑު ސަބަބުތަކަކީ ޓޫރިޒަމް ދާއިރާގެ ޖީއެސްޓީ، ގްރީން ޓެކްސް، އަދި އެއަރޕޯޓް ޓެކްސްގެ އާމްދަނީ އިތުރުވުމެވެ.
މިގޮތުން މިދިޔަ އަހަރުގެ އޮކްޓޫބަރު މަހަށްވުރެ މިއަހަރުގެ އޮކްޓޫބަރު މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 10.3 އިންސައްތަ އިތުރުވެފައިވުމާއި، މިއަހަރުގެ ޖެނުއަރީ 1 އިން ފެށިގެން ގްރީން ޓެކްސްގެ ރޭޓު ބޮޑުކުރުމާއި، މިދިޔަ އަހަރުގެ ޑިސެމްބަރު މަހުން ފެށިގެން އެއަރޕޯޓް ޓެކްސް އަދި ފީތަކުގެ ރޭޓުތައް ބޮޑުކުރުމަކީ އާމްދަނީ އިތުރުވި ސަބަބުތަކެވެ.
ނޮވެމްބަރު މަހު އަންދާޒާކުރި އާމްދަނީއަށްވުރެ 6.7 އިންސައްތަ އިތުރުވުމުގެ މައިގަނޑު ސަބަބަކީ ގްރީން ޓެކްސްއާއި ފަތުރުވެރިކަމުގެ ދާއިރާ ނޫން އެހެން ދާއިރާތަކުގެ ޖީއެސްޓީ އިތުރުވުމެވެ. މީގެ އިތުރުން ބިން ވިއްކުމާއި ބިން ބަދަލުކުރުމުގެ ފީއިން ލިބުނު އާމްދަނީއަކީވެސް އަންދާޒާކޮށްފައިނުވާ އާމްދަނީއެކެވެ.
ނޮވެމްބަރު މަހު ލިބުނު އާމްދަނީގެ އެންމެ ބޮޑު ބައި ހިއްސާކުރަނީ ފަތުރުވެރިކަމުގެ ދާއިރާއިން ލިބުނު ޖީއެސްޓީއެވެ. މިގޮތުން 1.30 ބިލިއަން ރުފިޔާ ޖީއެސްޓީގެ ގޮތުގައި ލިބިފައިވެއެވެ. ދެވަނައަށް އެންމެ ބޮޑު ޢާމްދަނީއެއްގެ ގޮތުގައި 191.06 މިލިއަން ރުފިޔާ ލިބިފައިވަނީ ގްރީން ޓެކްސްއިންނެވެ. އަދި އެއަރޕޯޓް ޑިވެލޮޕްމަންޓް ފީގެ ގޮތުގައި 175.87 މިލިއަން ރުފިޔާ، ޑިޕާޗަރ ޓެކްސްގެ ގޮތުގައި 164.99 މިލިއަން ރުފިޔާ، އާމްދަނީން ނަގާ ޓެކްސްގެ ގޮތުގައި 131.67 މިލިއަން ރުފިޔާ، އަދި ވަރކްޕަރމިޓް ފީގެ ގޮތުގައި 63.86 މިލިއަން ރުފިޔާ މީރާއަށް ވަނީ ލިބިފައެވެ.
ނޮވެމްބަރު މަހުގެ ޢާމްދަނީގެ ތެރޭގައި 103.23 މިލިއަން އެމެރިކާ ޑޮލަރުވެސް ހިމެނެއެވެ. މިއީ މިދިޔަ އޮކްޓޫބަރު މަހުގެ 85 މިލިއަން އެމެރިކާ ޑޮލަރަށްވުރެ އިތުރު ޢަދަދެކެވެ. މި މަހު ލިބުނު ޢާމްދަނީގެ 19.7 އިންސައްތައަކީ ކުރީގެ ސުންގަޑިތަކަށް ދައްކާފައިވާ ފައިސާ ކަމަށްވާއިރު، 21 އިންސައްތައަކީ މީރާއަށް ދައްކަންޖެހި ނުދެއްކި ހުރި ފައިސާ ހޯދުމަށް ކުރި މަސައްކަތުން ލިބިފައިވާ އާމްދަނީއެވެ.
