ރާއްޖޭގައި ހުރި ބޮޑެތި މައްސަލަތައް ހައްލުކޮށް ރާއްޖޭގެ ހުރިހާ ރަށެއްގައި ރައްކާތެރިކަން ގާއިމްކޮށްދިނުމަށް މަސައްކަތްކޮށްދިނުމަށް ހޯމް މިނިސްޓަރު އަލީ އިހުސާން ދިވެހި ފުލުހުންގެ ކިބައިން އެދިވަޑައިގެންފިއެވެ.
އިހްސާން މިފަދައިން އެދިވަޑައިގެންފައި ވަނީ ރޭ ބޭއްވި،41ވަނަ ޕޮލިސް އިނީޝިއަލް ޓަރެއިނިން ކޯހުގެ ދަސްވެނިވުމުގައި ވާހަކަ ދައްކަވަމުންނެވެ. އިހުސާން ވިދާޅުވީ، ސަރުކާރުން ފުލުހުންނާ ހަވާލުކުރާ ކާއްސަ މިޝަންތަކެއް ވާކަމަސެވެ. އެއީ، ރާއްޖެއިން މަސްތުވާތަކެތީގެ ވަބަ އެއްކޮށް ނައްތައިލުމާއި، ރާއްޖޭގައި ގޭންގު ހަދައިގެން ކުށްކުރާ ގްރޫޕުތައް ގާނޫނުގެ ކުރިމައްޗަށް ގެނައުމާއި، ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުން އަދި ކުށުގެ ވެށީގައި އުޅޭ ކުޑަކުދިން ސަލާމަތްކުރުން ކަމަށެވެ.
މިއީ ރޭ ދަސްވެނިވި ހުރިހާ ފުލުހުން ވެސް މިއަދުން ފެށިގެން ކުރަންޖެހޭ ކަންކަން ކަމަށް އޭނާ ވިދާޅުވިއެވެ.
"ދިވެހި ރައްޔިތުން އެދެނީ70 ޕަސަންޓެއް ނޫން،80 ޕަސަންޓެއް ވެސް ނޫން، ދިވެހި ރައްޔިތުން އެދެނީ100 ޕަސަންޓު ރާއްޖޭގެ ސަލާމަތާއި ރައްކާތެރިކަން ކަށަވަރުވެފައި އޮތުން. ދިވެހި ރައްޔިތުން އެދެނީ ރާއްޖޭގެ ކޮންމެ މަގަކީ، ކޮންމެ ގޯލިގަނޑަކީ، ކޮންމެ ރަށަކީ، ކޮންމެ އަނދިރި ހިސާބަކީ ރައްކާތެރިކަންކަށަވަރުވެފައި އޮތް އެމީހުންނަށް މަގު ހިނގާ އުޅެވޭނެ، ސަލާމަތާއި ރައްކާތެރިކަމުގެ އިހުސާސް ވަމުންދާފަދަ މާހައުލު އޮތް ފަދަ ތަނެއްކަން ކަށަވަރުވެގެން ތިބުން،" އިހުސާން ވިދާޅުވިއެވެ،
މި މާހައުލުގައި ނުރައްކާތެރިކަމާ އެއްވަރަށް ކޮރަޕްޝަން އޮތްކަން ފާހަގަކުރައްވައި އިހުސާނު ވިދާޅުވީ، މީހުން ފައިސާދީ، މަގާމުގެ ކުރިއެރުމަށް ވައުދުވީނަމަވެސް މިއަދު ދަސްވެނިވާ ފުލުހުން އެތިބި ސާބިތުކަން ދުއްވައިލައިގެން ނުވާނެ ކަމަށެވެ. ކޮރަޕްޝަނަކީ ފުލުހުންގެ އިދާރައިގައި ބަލައިގަންނާނެ ކަމެއް ނޫންކަމަށާއި މިފގަދަ ބަލިމަޑުކަމެއްގައި އެއްވެސް ފުލުހަކު ނުޖެހުމަށް ނަސޭހަތްތެރިވާކަމަސް އިހުސާން ވިދާޅުވިއެވެ.
ރޭގެ ރަސްމިއްޔާތުގައި ވަނީ 210 އޮފިސަރުން ދަސްވެނިވެފައެވެ.
