ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުން ސިންގަޕޯ އެއާލައިންސްއަށް މިއަދު ޚިދުމަތްދޭން ފަށައިފިއެވެ.
މިކަން ފާހަގަކުރުމަށް ޓާމިނަލުގައި މިއަދު ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއީލް ރަޝީދުއެވެ.
މި ރަސްމިއްޔާތުގައި އެމްއޭސީއެލްގެ ސީއީއޯ އިބްރާހީމް ޝަރީފް މުހައްމަދާއި ސިންގަޕޯ އެއާލައިންސްގެ ޖެނެރަލް މެނޭޖަރު ހާޒިގު ސުލައިމާނާއި އެމްއޭސީއެލްގެ އިސްވެރިން އަދި އޮފިޝަލުން ބައިވެރިވެ ވަޑައިގަތެވެ.
މިއަދު ބޭއްވި ރަސްމިއްޔާތުގައި ވަނީ ސިންގަޕޯ އެއާލައިންސްގެ ކައުންޓަރުތައް ހުޅުވައި އެ އެއާލައިނުން ފުރި 205 ފަސިންޖަރުންނަށް ހަދިޔާ ދީފައެވެ. އަދި ޓާމިނަލް އެކަކަށް ކައިރިކުރި ސިންގަޕޯ އެއާލައިންގެ ފުރަތަމަ ފްލައިޓުން ރާއްޖެ އައި 244 ފަސިންޖަރުންނަށް ވަނީ ސަގާފީ ހަރަކާތްތަކާއެކު ހޫނު މަރިހަބާއެއް ކިޔާފައެވެ.
ސިންގަޕޯ އެއާލައިނުން ރާއްޖެއަށް ދަތުރުކުރަން ފެށީ1984ވަނަ އަހަރުގެ މާޗް މަހުގެ28ވަނަ ދުވަހުއެވެ.