އައްޑޫ ސިޓީ، ހިތަދޫ ފްލެޓް ސަރަހައްދުގައި ހުރި ސައިކަލުތަކެއްގައި ރޭ އަލިފާން ރޯވެ ގެއްލުންތަކެއް ވެއްޖެއެވެ،
އެމްއެންޑީއެފުން ބުނީ މި ހާދިސާ ހިނގީ 11 ނަންބަރު ފުލެޓް ސަރަޙައްދުގައި ހުރި ސައިކަލްތަކެއްގައިކަމަށެވެ. މި ހާދިސާގެ ރިޕޯޓް އެމްއެންޑީއެފް ސަދަން އޭރިއާ ކޮމާންޑަށް ލިބުނީ ރޭ ދަންވަރު 04:10 ހާއިރެވެ.
ރިޕޯޓު ލިބުމާއެކު އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔާ ސްޓޭޝަނުގެ ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތްކޮށްފައި ވާކަމަށް އެ އިދާރާއިން ބުންޏެވެ. މިގޮތުން ފަޔާ ފައިޓަރުން ކުރި މަސައްކަތުން ސައިކަލުތަކުގައި ރޯވެފައި ހުރި އަލިފާން ނިއްވާލެވުނީ ރޭ 04:25 ހާއިރުއެވެ.
މި ހާދިސާގައި ދެ ސައިކަލު ބޭނުން ނުކުރެވޭ ވަރަށް އަނދާފައިވެއެވެ. ނަމަވެސް، މިއީ ކިހިނެތް ހިނގި ހާދިސާއެއްކަމެއް އެމްއެންޑީއެފުން އަދި ހާމަކޮށްފައެއް ނުވެއެވެ.
މީގެކުރިން ގަސްދުގައި ސައިކަލުގައި ރޯކޮށްލުމުގެ ހާދިސާތައް ވެސް ހިނގާފައި ވެއެވެ.