އާންމު ދަތުރުފަތުރާއި ޕަބްލިކް ފެރީއާއި މަސްވެރިންނާއި އާންމު ހިދުމަތް ދޭ ފަރާތްތަކަށް ކުރިންވެސް ކަނޑައަޅާފައިވާ އަގުތަކުގައި ތެޔޮ ފޯރުކޮށްދޭނެ ކަމަށް އެސްޓީއޯއިން ބުނެފިއެވެ.
އެސްޓީއޯގެ އޮފިޝަލަކު މިރޭ ވިދާޅުވީ ކުރިއެކޭ އެއް އަގެއްގައި ތެޔޮ ލިބޭނެކަމަށެވެ.
އެސްޓީއޯއިން މަސްވެރިންނަށާއި ޕަބްލިކް ފެރީއާއި އާންމު ދަތުރުތަކަށް ދޫކުރާ ތެޔޮ ލިބޭނެ އަގަށް ބަދަލު ނާންނަ ކަމަށް ބުނެފައި މިވަނީ އަތޮޅު ތެރޭގައި ތެލުގެ އަގު އުފުލުމާއެކު ދަތުރުފަތުރުކުރާ ބައެއް ފަރާތްތަކުން އަގުތައް ބޮޑުކުރުމުންނެވެ.
މާލެ ސަރަހައްދުގައި ތެލުގެ ވިޔަފާރިކުރާ ފަރާތަކުން މައުލޫމާތު ދިން ގޮތުގައި، އިއްޔެއާ ހަމައަށް ޑީސަލް ލީޓަރެއް 16.52 ރުފިޔާއަށް ލިބުނު ނަމަވެސް، މިއަދުން ފެށިގެން އެ އަގު ވަނީ 27.22 ރުފިޔާއަށް ބޮޑުވެފައެވެ. އަދި 15.00 ރުފިޔާއަށް ލިބެމުންދިޔަ ޕެޓްރޯލް ލީޓަރެއްގެ އަގު ވަނީ 26.14 ރުފިޔާއަށް އުފުލިފައެވެ.
މީގެ އިތުރުން، އަތޮޅުތެރޭގައި އެސްޓީއޯއިން ތެޔޮ ގަނެގެން ޝެޑްތައް ހިންގާ ފަރާތްތަކަށްވެސް ކުރީގެ އަގުތަކުގައި ތެޔޮ ލިބޭނެ ގޮތް މިހާރު ހަމަޖައްސާފައިވާނެ ކަމަށް އެސްޓީއޯއިން ބުންޏެވެ.