ރާއްޖޭގެ ދެކުނުގެ ހިސާބުތަކަށް މިއަހަރުގެ ހުޅަނގު މޫސުން ރަސްމީކޮށް ފަށާފައިވާ ކަމަށް މޫސުމާ ބެހޭ ގައުމީ އިދާރާއިން (މެޓް އޮފީސް) ހާމަކޮށްފިއެވެ.
މެޓް އޮފީހުން ބުނި ގޮތުގައި، ދެކުނުގެ އަތޮޅުތަކަށް ހުޅަނގު މޫސުން ފެށުނީ މިދިޔަ ހުކުރު ދުވަހުއެވެ. އެއީ މެއި މަހުގެ 8 ވަނަ ދުވަހެވެ. އާންމު ގޮތެއްގައި ކޮންމެ އަހަރަކުވެސް މެއި މަހުގެ ފުރަތަމަ ނުވަތަ ދެވަނަ ހަފުތާގެ ތެރޭގައި ރާއްޖޭގެ ދެކުނަށް ހުޅަނގު މޫސުމުގެ އަސަރުތައް ފޯރަން ފަށައެވެ. އޭގެ ފަހުން މަޑުމަޑުން މެދުރާއްޖެތެރެއަށް މޫސުމުގެ އަސަރުތައް ފޯރައި، މި މަސް ނިމުމުގެ ކުރިން މުޅި ރާއްޖެއަށް ހުޅަނގު މޫސުން ފެށޭނެ ކަމަށް އެ އިދާރާއިން ލަފާކުރެއެވެ.
08th May 2026 marks the onset of Southwest monsoon over the Maldives. pic.twitter.com/WqXADUbLOc
— Maldives Meteorology (@MetMaldives) May 10, 2026
މޫސުން ފެށުނު ކަމަށް ބަލާ މިންގަނޑުތައް
ހުޅަނގު މޫސުން ފެށުނު ކަމަށް ކަނޑައެޅުމުގައި މެޓް އޮފީހުން ބަލާ މައިގަނޑު ދެ މިންގަނޑެއް އޮވެއެވެ. އެއީ ވާރޭވެހުމާއި ވައިގެ މިސްރާބާއި ބާރުމިނެވެ.
- ވާރޭވެހުން: މެއި މަހުގެ 1 ވަނަ ދުވަހުގެ ފަހުން، ދެކުނުގެ އަތޮޅުތަކުގައި ގާއިމުކޮށްފައިވާ މޫސުމީ ސްޓޭޝަންތަކުގެ ތެރެއިން މަދުވެގެން 60 އިންސައްތަ ސްޓޭޝަނަށް ދުވާލަކު 2.5 މިލިމީޓަރަށް ވުރެ ގިނައިން ވާރޭވެހުން.
- ވައިގެ ބާރުމިން: މެއި މަހުގެ 1 ވަނަ ދުވަހުގެ ފަހުން، ދެކުނުގެ ސްޓޭޝަންތަކުގެ 60 އިންސައްތަ ސަރަހައްދަށް ވައިގެ މިސްރާބު ހުޅަނގު ދެކުނާއި ހުޅަނގާ ދެމެދު ހުރެފައި، ގަޑިއަކު 10 ނޯޓިކަލް މޭލަށް ވުރެ ބާރުމިނުގައި ވައިޖެހުން.
މި ހާލަތްތައް ވިދިވިދިގެން ދެ ދުވަހު ނުވަތަ އެއަށްވުރެ ގިނަ ދުވަހު ދެމިގެން ދިއުމުން، އެއީ ހުޅަނގު މޫސުން ފެށުނީ ކަމަށް ބަލާނެ ކަމަށް އެ އިދާރާއިން ބުނެއެވެ. މިއަހަރުގެ މޫސުމީ ބަދަލުތައް ފެންނަން ފެށީ މި މިންގަނޑުތަކަށް ފެތޭ ގޮތަށް ކަމަށް މެޓް އޮފީހުން ފާހަގަކުރެއެވެ.
ރާއްޖޭގެ މޫސުމީ ދެ ދައުރު
ރާއްޖޭގެ މޫސުން ބެހިގެންވަނީ މައިގަނޑު ދެ ދައުރަކަށެވެ. އެއީ ހުޅަނގު މޫސުމާއި އިރުވައި މޫސުމެވެ. އިރުވައި މޫސުމަކީ އާންމު ގޮތެއްގައި ޖެނުއަރީ މަހުން ފެށިގެން މާޗު މަހުގެ ނިޔަލަށް ދެމިގެންދާ މޫސުމެކެވެ. ހުޅަނގު މޫސުން އާންމުކޮށް ދެމިގެންދަނީ މެއި މަހުން ފެށިގެން ނޮވެމްބަރު މަހުގެ ނިޔަލަށެވެ.
މޫސުން ބަދަލުވާ މި ދުވަސްވަރަކީ ކަނޑުގަދަވެ، ވިއްސާރަ ކުރާނެ ދުވަސްވަރަކަށް ވާތީ، ކަނޑުދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ އިދާރާތަކުން އަބަދުވެސް އިރުޝާދު ދެއެވެ.