ދިވެހި ދައުލަތަށް 41 އަހަރަށްވުރެ ދިގު މުއްދަތަކަށް އިޚްލާޞްތެރި ހިދުމަތްތަކެއް ކުރެއްވި ފުވައްމުލައް ސިޓީ، މާދަނޑު، ސަމާ، ފާރޫޤް އަޙްމަދު އަވަހާރަވުމާ ގުޅިގެން، އެ މަރުޙޫމުގެ އާއިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފިއެވެ. ފާރޫޤް އަޙްމަދަކީ ފުވައްމުލަކުގެ ތަރައްޤީއަށާއި އިދާރީ ހިންގުމަށް ގިނަގުނަ މަސައްކަތްތަކެއް ކޮށްދެއްވާފައިވާ ބޭފުޅެކެވެ.
ރައީސުލްޖުމްހޫރިއްޔާ ފޮނުއްވި ތަޢުޒިޔާގެ މެސެޖުގައި، ފާރޫޤް އަޙްމަދަކީ ދައުލަތުގެ އެކި މަޤާމުތަކުގައި ގިނަ ދުވަސްތަކެއް ވަންދެން ހިދުމަތްކުރެއްވި ބޭފުޅެއްކަން ފާހަގަކުރެއްވިއެވެ. ވަކީން ހާއްސަކޮށް، ފުވައްމުލަކުގެ އަތޮޅުވެރިކަމާއި، އެ އަތޮޅުގެ އިދާރީ ހިންގުމުގެ އެކި މަގާމުތަކުގައި އޭނާ ކޮށްދެއްވި އަގުހުރި މަސައްކަތްޕުޅުތަކަށް ރައީސް ވަނީ ތައުރީފުކުރައްވާފައެވެ. އޭނާގެ ހިދުމަތުގެ ދައުރުގައި ރަށުގެ އިޖުތިމާއީ އަދި އިދާރީ ކުރިއެރުމަށް ބޮޑެތި ހިދުމަތްތަކެއް ކޮށްދެއްވިކަން ރައީސް ފާހަގަކުރެއްވިއެވެ.
إِنَّا لِلّهِ وَإِنَّـا إِلَيْهِ رَاجِعُونَ
ދިވެހި ދަައުލަތަށް 41 އަހަރަށްވުރެ ދިގު މުއްދަތަކަށް ޚިދުމަތްކުރެއްވި، ވަކީން ޚާއްޞަކޮށް ފުވައްމުލަކު އަތޮޅުވެރިކަމާއި އިދާރީގޮތުން ހިންގުމުގެ އެކި މަޤާމުތަކުގައި ބޮޑެތި ޚިދުމަތްތަކެއް ކޮށްދެއްވި، ފުވައްމުލައް ސިޓީ، މާދަނޑު، ސަމާ،… pic.twitter.com/Rp8uAEbQGr
— Dr Mohamed Muizzu (@MMuizzu) May 18, 2026
މީގެއިތުރުން، ފާރޫޤް އަޙްމަދަކީ ދިވެހި އަދަބިއްޔާތާއި ތާރީހުގެ ދާއިރާއިންވެސް ފާހަގަކޮށްލެވޭ ފަދަ ހިދުމަތްތަކެއް ކުރެއްވި ތަޖުރިބާކާރު ޝަހުސިއްޔަތެއްކަމަށް ރައީސުލްޖުމްހޫރިއްޔާ ވިދާޅުވިއެވެ. އޭނާ އަވަހާރަވުމަކީ ދިވެހި އަދަބިއްޔާތަށާއި ތާރީހަށް ލިބުނު އުނިކަމެއްގެ ގޮތުގައި ރައީސް ސިފަކުރެއްވިއެވެ. ފާރޫޤް އަޙްމަދަކީ ދިވެހި ބަހާއި ސަގާފަތަށް ލޯބިކުރެއްވި، އަދި އެ ދާއިރާތަކުން މައުލޫމާތު މުއްސަނދި ބޭފުޅެއްގެ ގޮތުގައި ގިނަ ބަޔަކު ބަލައިގަނެއެވެ.
އުމުރުން 85 އަހަރުގައި ފާރޫޤް އަޙްމަދު އަވަހާރަވިއިރު، އޭނާގެ ކަށުނަމާދު ބޭއްވުމަށް ހަމަޖެހިފައިވަނީ މިއަދުގެ އަޞްރު ނަމާދަށްފަހު އާސަހަރާ މިސްކިތުގައެވެ. ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ މަރުޙޫމުގެ ފާފަ ފުއްސަވައި، ސުވަރުގޭގެ ދާއިމީ ނިޢުމަތް މިންވަރުކޮށްދެއްވުމަށް އެދި ﷲގެ ޙަޟްރަތުގައި ދުޢާކުރައްވަމުންނެވެ. އަދި މި ހިތާމަވެރި ވަގުތުގައި އާއިލާއަށް ކެތްތެރިކަން ދެއްވުމަށްވެސް އެމަނިކުފާނު އެދިވަޑައިގެންނެވިއެވެ.